Բանակին կարագի անվան տակ մարգարին է մատակարարվել 2016-17 թթ.

Բանակին կարագի անվան տակ մարգարին է մատակարարվել եւ դա հնարավոր է դարձել ԳՆ սննդամթերքի անվտանգության պետական ծառայության լաբորատորիայում փորձաքննության արդյունքների հիման վրա: Կատարվածի առնչությամբ ԱԱԾ-ն քրեական գործ է հարուցել: Այս մասին գրում է Aysor.am-ը: Հստակ տեղեկություն ստանալու համար լրատվամիջոցը գրավոր հարցում էր ուղարկել Ազգային անվտանգության ծառայության տնօրեն Գեորգի Կուտոյանին: Մասնավորապես, հետաքրքրվել էր՝ ՀՀ ԳՆ ՍԱՊԾ-ի «Հանրապետական անասնաբուժասանիտարական եւ բուսասանիտարական լաբորատոր ծառայությունների կենտրոն» (ՀԱԲԼԾԿ) ՊՈԱԿ-ի վերաբերյալ քրեական գործ է քննվու՞մ ԱԱԾ քննչական վարչությունում: Խնդրել էիր ներկայացնել՝ ի՞նչ հիմքով եւ արդյո՞ք այդ քրեական գործը կապված է ՀԱԲԼԾԿ եզրակացությամբ փաստաթղթերի հիման վրա բանակին կարագի փոխարեն մարգարին մատակարարելու դեպքի հետ: Այս հարցին ստացել են հետեւյալ պատասխանը. «ՀՀ ԿԱ ԱԱԾ քննչական վարչությունում քննվող քրեական գործի շրջանակներում պարզվել է, որ 2016-2017թթ. ընթացքում ՀՀ  պաշտպանության նախարարության կարիքների համար սերուցքային կարագի փոխարեն, երկու ընկերությունների կողմից մատակարարվել են ՀՀ-ում արտադրված 172.300 կգ  «Մարգարին» եւ 14.250 կգ «Սպրեդ» տեսակի ապրանքներ, որոնք  նույնականացման են ներկայացվել ՀՀ գյուղատնտեսության նախարարության սննդամթերքի անվտանգության պետական ծառայության «Հանրապետական  անասնաբուժասանիտարական եւ բուսասանիտարական լաբորատոր ծառայությունների կենտրոն» պետական ոչ առեւտրային կազմակերպություն, որի չորս մասնագետի կողմից տրվել է փորձարկման ակնհայտ կեղծ արձանագրություններ՝ սերուցքային կարագ հանդիսանալու վերաբերյալ, ինչը հնարավոր է դարձրել խաբեությամբ կարագի փոխարեն նշված ապրանքատեսակների մատակարարումը ՀՀ պաշտպանության նախարարությանը»: Այս ամենի հետեւանքով, ըստ ԱԱԾ-ից ստացված պատասխանի, պետությանը պատճառվել է 162 մլն 914 հազար 567 ՀՀ դրամ գումարի վնաս: Հարցին՝ թե ովքե՞ր են անցնում այդ քրեական գործով եւ ի՞նչ կարգավիճակ ունեն նրանք՝ կասկածյա՞լ են, թե՞ մեղադրյալ, ի պատասխան ԱԱԾ-ից նշել են, որ քրեական գործով մեղադրանքներ են առաջադրվել՝ արտադրությունը եւ մատակարարումները կազմակերպած անձին, ընկերությունների երկու տնօրեններին, ՀՀ ԳՆ ՍԱՊԾ ՀԱԲԼԾԿ ՊՈԱԿ-ի չորս մասնագետին: Նշված 7 մեղադրյալից 3-ի նկատմամբ խափանման միջոց է ընտրվել կալանավորումը, իսկ 4-ի նկատմամբ՝ ստորագրություն չհեռանալու մասին: Ստացված պաշտոնական պատասխանում անուններ նշված չեն: Լրատվամիջոցը զուգահեռ հարցում էր ուղարկել նաեւ ԳՆ ՍԱՊԾ լրատվական ծառայություն՝ խնդրելով ներկայացնել, թե արդյո՞ք «Հանրապետական անասնաբուժասանիտարական եւ բուսասանիտարական լաբորատոր ծառայությունների կենտրոն» ՊՈԱԿ սննդամթերքի անվտանգության լաբորատորիայում աշխատում են մասնագետներ Ցողիկ Գզիրյանն ու Հեղինե Ղարիբյանը եւ եթե չեն աշխատում, ապա ինչ պատճառով: Այս հարցի առաջին մասին են միայն ՍԱՊԾ լրատվական ծառայությունից պատասխանել` տեղեկացնելով, որ նշված անձինք չեն աշխատում: Սակայն, թե ի՞նչ պատճառով Գզիրյանն ու Ղարիբյանը չեն աշխատում լաբորատորիայում, մնում է անհայտ: Նաեւ ակտիվորեն տեղեկություններ էին շրջանառվում, որ մատակարար ընկերությունները կապ ունեն ՍԱՊԾ պետի տեղակալ Եղիշե Մարգարյանի հետ: Օրեր առաջ ՍԱՊԾ պետ Իշխան Կարապետյանը լրագրողների հետ հանդիպմանն անդրադարձել էր այս դեպքին, ասել, որ այն իր ղեկավարած հիմնարկի որեւէ պաշտոնյայի հետ կապ չունի եւ իր պաշտոնավարման տարիներին նման դեպք տեղի չի ունեցել: Ավելի մանրամասն՝ սկզբնաղբյուրում