«Ճվճվ Արոյի» որդին ներկայացել է իրավապահներին

«Ճվճվ Արոյի» որդու մասնակցությամբ մահվան ելքով վթարի դեպքով հարուցվել է քրեական գործ: «Փաստինֆո»-ի թղթակիցը Քննչական կոմիտեից տեղեկացավ, որ այսօր գիշերը Սայաթ-Նովա պողոտայի և Աբովյան փողոցի խաչմերուկում տեղի ունեցած մահվան ելքով վթարի դեպքով հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածով: Նշենք, որ վթարը տեղի է ունեցել գիշերը ժամը 04:40-ի սահմաններում, «ԲՄՎ X6» մակնիշի ավտոմեքենան և «Տոյոտա» մակնիշի ավտոմեքենանները բախվել են, որից հետո «ԲՄՎ X6» մակնիշի ավտոմեքենան, դուրս է եկել ճանապարհի երթևեկելի հատվածից և բախվել գովազդային վահանակի: Վթարի հետևանքով «Տոյոտա»-ի վարորդը մահացել է, իսկ նրա ուղևորը և «ԲՄՎ X6»-ի 2 ուղևորները մարմնական վնասվածքներ են ստացել: Տեղի ունեցածից հետո «ԲՄՎ X6» ավտոմեքենայի վարորդը, ով ըստ տեղեկությունների «Ճվճվ Արոյի» որդին է, լքել է դեպքի վայրը: Նշենք, որ «Տոյոտա» մակնիշի ավտոմեքենայի մեջ եղել են ոստիկաններ, նրանցից մեկը՝ վարորդը, ինչպես նշեցինք մահացել է, իսկ մյուսի վիճակը, ով գտնվում է հիվանդանոցում՝ ծանր է: Մեր տեղեկություններով՝ «Ճվճվ Արոյի» որդին ներկայացել է իրավապահներին: