«Սուլթան» մականունով Էրդողանի երազանքը

Ռումինիայում, Եգիպտոսում և Շվեդիայում Իսրայելի նախկին դեսպան Ցվի Մազելը, ով աշխատում է Երուսաղեմի հասակարական խնդիրների կենտրոնում, The Jerusalem Post-ի համար վերլուծություն է գրել։ Ըստ նրա՝ «սուլթան» մականունով Թուրքիայի նախագահ Ռեջեփ Թայիփ Էրդողանը երազում է Օսմանյան կայսրության վերածննդի մասին, և որ նրա համար միայն Սև ծովը քիչ է, Էրդողանը հայացքը սևեռել է Կարմիր ծովի վրա, որտեղ նա ծրագրում է ստեղծել ռազմական և հետախուզական ենթակառուցվածք։ Նա արդեն էքսպեդիցիոն կորպուս է ուղարկել Կատար, որպեսզի վերջինս օգնի իրեն Պարսից ծոցի էմիրությունների և Եգիպտոսի հետ դիմակայությունում։ Իսկ դեկտեմբերի վերջին Էրդողանն ուղևորվել էր Սուդան, որտեղ հուշագիր է ստորագրել տեղի իշխանությունների հետ, որոնք համաձայնել են Թուրքիայի տնօրինմանը հանձնել Սուակին կղզին, որպեսզի նա այնտեղ կարողանա անսահմանափակ ժամանակահատվածում շինարարություն իրականացնել։ Ըստ ամենայնի, խոսքը ռազմածովային բազայի շինարարության մասին է։ Կղզին գտնվում է Սաուդյան Արաբիայի ափերի դիմաց։ Սուակինից Ջեդդա ամեն օր նավեր են գնում։ Թուրքիան ավելի վաղ ռազմաբազա էր ձեռք բերել Սոմալիում։   Այժմ Թուրքիան միություն է կնքել նաև Կատարի հետ ընդդեմ Եգիպտոսի։ Նրանց միացել է Սուդանը, ում հետ Եգիպտոսը բազմամյա վեճ ունի Նեղոսի ջրերի անհավասար բաշխման պատճառով։ Հոդվածագրի կարծիքով՝ այդ կոնֆլիկտը միանգամայն կարող է վերաճել լայնածավալ պատերազմի։