Իրավաբանը պարզաբանում է՝ ինչպես պահանջել փոխհատուցում Երևանի փոսերի համար

Երևանում փոսերի խնդիրը շարունակում է մնալ օրակարգային, հատկապես ձմռան ավարտին, երբ ձյան հալոցքից հետո ճանապարհներին բացվում են խորը փոսեր։ Վարորդները ոչ միայն կրում են նյութական վնաս, այլև հաճախ կանգնում են բարդ իրավական գործընթացի առաջ՝ փորձելով հասկանալ՝ ո՞վ պետք է հատուցի վնասը։
Իրավաբան Մհեր Հակոբյանի խոսքով՝ հարցը քաղաքացիաիրավական հարաբերությունների տիրույթում է՝ վնասի պատճառման և դրա հատուցման ինստիտուտի շրջանակում, սակայն քանի որ մյուս կողմը պետական մարմին է, այն ստանում է վարչական բնույթ և կարգավորվում է վարչական ու վարչական դատավարական ընթացակարգերով։
«Չեմ կարող ասել, թե քաղաքապետարանը 100 տոկոս դեպքերում չի փոխհատուցում վնասը։ Հնարավոր է՝ նման դեպքեր կան։ Բայց մեծամասամբ քաղաքապետարանը այս կամ այն պատճառաբանությամբ ձգձգում է գործընթացը, և անձինք ստիպված են լինում դիմել դատարան»,-Aysor.am-ի հետ զրույցում ասաց Հակոբյանը։
Նրա խոսքով՝ եթե քաղաքապետարանը հրաժարվում է կամ չի լուծում հարցը, քաղաքացիների համար մնում է մեկ ճանապարհ՝ վարչական դատարան։ Դատավարության ընթացքում ապացուցման բեռը մնում է վնաս կրած անձի վրա։
«Անձը պետք է հավաքի բոլոր ապացույցները, հիմնավորի վնասը։ Ի պատիվ վարչական դատարանի՝ կարող եմ ասել, որ հիմնականում այդ հայցերը բավարարվում են։ Ցավալի է, որ քաղաքապետարանը միանգամից չի տալիս դրական լուծում, այլ թողնում է, որ հարցը հասնի դատարան»։
Իրավաբանը կարևորում է դեպքի ճիշտ փաստագրումը հենց սկզբից․ անհրաժեշտ է կանչել պարեկային ծառայություն, որպեսզի պետական պաշտոնյան արձանագրի տեղի ունեցածը։ Ցանկալի է նաև իրականացնել տեսանկարահանում, ունենալ վկաներ։
«Հետագայում շատ կարևոր է ապացուցել, որ մեքենան հենց այդ օրը և այդ ժամին է ընկել տվյալ փոսը և վնասվել։ Քաղաքապետարանը պարտավոր է ապահովել պատշաճ ճանապարհ։ Ի վերջո, մարդիկ ոչ քիչ հարկեր են վճարում»։
Մինչ իրավաբանները խոսում են փոխհատուցման իրավունքի և դատական ճանապարհի մասին, քաղաքապետ Տիգրան Ավինյանը հայտարարում է՝ խնդիրը հայտնի է և արդեն սկսվել են լայնածավալ աշխատանքներ։
«Գիտենք, որ այս պահին Երևանում առկա է փոսերի խնդիր, և դա ձեզ համար անհարմարություն է պատճառում։ Փոսերը հիմնականում առաջացել են ձմեռային սեզոնի ընթացքում՝ բազմակի սառչել–հալվել ցիկլերի, ճանապարհային ծածկի մեջ ջրի ներթափանցման և ձյան դեմ կիրառված աղի ազդեցության հետևանքով»,-գրել է Ավինյանը։
Քաղաքապետի փոխանցմամբ՝ մեկնարկել է փոսային նորոգման ընթացիկ տարվա հիմնական ու լայնածավալ ծրագիրը, նախատեսվում է իրականացնել շուրջ 200 հազար քմ աշխատանք։ Բոլոր վարչական շրջաններում գործընթացը կազմակերպվելու է գիշերային ժամերին՝ նախ վնասված հատվածների կտրումով, ապա նոր ասֆալտբետոնե ծածկի տեղադրմամբ։ Ապրիլից կմեկնարկի նաև միջին նորոգման տարեկան ծրագիրը։
Քաղաքապետը հորդորում է երևանցիներին համբերատար լինել՝ վստահեցնելով, որ աշխատանքները լինելու են ինտենսիվ և հետևողական։
Սակայն մինչ ճանապարհաշինական տեխնիկան դուրս է եկել փողոցներ, տուժած վարորդների համար խնդիրը շարունակում է մնալ ոչ միայն փոսերի լցումը, այլ նաև արդեն կրած վնասի փոխհատուցումը։ Եվ այդ հարցում, ըստ իրավաբանների, առանց հետևողականության և երբեմն՝ առանց դատարանի, արդյունքի հասնելը դժվար է։