Սրացումը հասել է առավել վտանգավոր աստիճանի

Ֆրանսահայ կազմակերպությունների համակարգման խորհուրդը (CCAF) խոր վշտով և ամենախիստ դատապարտմամբ արտահայտում է իր դիրքորոշումը Հայաստանում Հայ Առաքելական Սուրբ Եկեղեցու դեմ ձեռնարկված հալածանքների առնչությամբ։

Սույն սրացումը հասել է առավել վտանգավոր աստիճանի՝ Ամենայն Հայոց Հայրապետ, Նորին Սրբություն Գարեգին Բ Կաթողիկոսի նկատմամբ հարուցված անհիմն և անօրինական հետապնդումներով, այնպիսի հարցերի շուրջ, որոնք իրենց բնույթով ակնհայտորեն պատկանում են բացառապես Եկեղեցու ներքին՝ կանոնական իրավասությանը։

Քաղաքական շարժառիթներով իրականացվող այս արշավը, ուղղված Հայ Եկեղեցու Գերագույն Հովվի և նրա սրբազան հիերարխիայի դեմ, անթույլատրելի ոտնձգություն է հայ ազգային ինքնության հիմնասյուներից մեկի նկատմամբ։ Այն վտանգում է ողջ հայ ազգի միասնականությունը՝ Մայր Հայրենիքից մինչև Սփյուռք, և ստեղծում ներքին պառակտում, որի շահառուն կարող են լինել միայն մեր ժողովրդի թշնամիները։

Այն ժամանակահատվածում, երբ հայ ժողովուրդը կանգնած է ծանր արտաքին մարտահրավերների առաջ, նա չի կարող իրեն թույլ տալ նման ներքին ցնցումներ, որոնք նույնքան անպատվաբեր են, որքան կործանարար՝ թե՛ ազգային միասնության, թե՛ հոգևոր ու բարոյական տոկունության համար։

CCAF-ը հորդորում է Հայաստանի Հանրապետության վարչապետին և նրա կառավարությանը սթափորեն վերանայել իրենց քայլերը և անհապաղ դադարեցնել այս վտանգավոր ընթացքը, որը հիշեցնում է ստալինյան շրջանի գործելակերպը և մեր պատմության մութ ու ցավալի էջերը։

CCAF-ը պահանջում է անհապաղ վերանայել և չեղարկել Ամենայն Հայոց Կաթողիկոսի, Գերագույն հոգևոր խորհրդի վեց եպիսկոպոս անդամների, ինչպես նաև Նորին Սրբության քարտուղարի նկատմամբ կայացված անօրինական որոշումները։

CCAF France-ը իր խորին հարգանքն ու որդիական նվիրվածությունն է հայտնում Ամենայն Հայոց Հայրապետ Նորին Սրբություն Գարեգին Բ-ին և վերահաստատում է իր լիակատար աջակցությունն ու համերաշխությունը Հայ Առաքելական Սուրբ Եկեղեցուն։

Համանախագահներ` Մուրադ Փափազյան, Արա Թորանյան

14 փետրվարի 2026 թ.