Փաշինյանը բոլոր ճակատներում կռիվ է տալու իր առավելագույն ընտրական հարմարավետության ու արդյունքի համար․ քաղաքագետ

Քաղաքագետ Հակոբ Բադալյանն թելեգրամյան իր ալիքում գրում է․ Իզմիրլյան բժշկական կենտրոնում Արմեն Չարչյանի աշխատասենյակի խուզարկությունը իհարկե ոչ մի կերպ զարմանալի համարել չի կարելի: Ինչպես նշել եմ, Նիկոլ Փաշինյանը բոլոր ճակատներում կռիվ է տալու իր առավելագույն ընտրական հարմարավետության ու արդյունքի համար, կանգ չառնելով նաեւ իրավապահ լծակներն օգտագործելու առաջ:

Նկատենք, որ նա հատկապես նոր քայլերի գնաց ԱՄՆ փոխնախագահ Վենսի այցից հետո՝ Օսիպյանին ու Մելքոնյանին մարտիմեկյան թեմայով մեղադրանքի առաջադրումն ու Իզմիրլյանի խուզարկությունը:

Սա այն աջակցության բերած որոշակի ինքնավստահության նոր ալիքն է, որ հնչեցրել է ԱՄՆ փոխնախագահը Երեւանում: Սա քաղաքականությունն է, իր այսպես ասած պերճանքով ու թշվառությամբ:

Եվ այստեղ վերստին ասեմ, որ գլխավոր հարցը եւ գնդակը արդեն տեւական ժամանակ հայաստանյան ընդդիմադիր ուժերի դաշտում է, ու շատ էական է, թե այն ինչպես են խաղարկելու եւ ինչ արդյունավետությամբ են Նիկոլ Փաշինյանի դաշտ տեղափոխելու գնդակը՝ անցկացնելով դարպասային գծից ներս, ընդ որում այնպես, որ «մրցավարը» չունենա գոլը չեղարկելու եւ ոչ մի շանս:

Նիկոլ Փաշինյանը անում է այն առավելագույնը, որ ինքը պետք է աներ, որ իր տեղում թերեւս կաներ յուրաքանչյուրը, ում համար իշխանության հարցը շատ վաղուց դարձել է կյանքի ու մահվան շատ սուր հարց, աննախադեպ սուր հարց, քան որեւէ մեկի համար երբեւէ: Նրա հետ թերեւս կարող է համեմատելի լինել միայն Զելենսկու վիճակը:

Հետեւաբար, հարցը այն է, թե որքան առավելագույնով է աշխատելու ընդդիմադիր դաշտը: