Պատմական անցյալն օրինակ է մերօրյա դժվարությունների ու մարտահրավերների դեմ միակամ ու միասնական պայքարելու՝ հանուն Եկեղեցու անսասանության. Եզրաս Սրբազան

Վարդանանց տոնին Մոսկվայի Սուրբ Պայծառակերպություն եկեղեցում հզոր ու միասնական աղոթք է հնչել թեմի տարբեր ծխերի քահանաների և երեցկանանց մասնակցությամբ:

Նրանք Մոսկվա էին ժամանել Սրբոց Ղևոնդյանց և Վարդանանց տոները միասին նշելու, Վեհափառ Հայրապետին անվանակոչության առիթով շնորհավորելու և իրենց հավատարմության ուխտն առ Մայր Աթոռ Սուրբ Էջմիածին վերահաստատելու:

Թեմակալ առաջնորդ Տեր Եզրաս արք. Ներսիսյանի հանդիսապետությամբ՝ կատարվել է Հայրապետական մաղթանք: Եզրաս Սրբազանը, շնորհավորելով հոգևորականներին, նշել է, որ Սրբոց Ղևոնդյանց և Վարդանանց հիշատակի տոնախմբումն առիթ է անդրադարձ կատարելու պատմական ու դարակազմիկ իրադարձությանը՝ որպես ազգային տոկունության և անսասան հավատքի արտահայտության:

«Պատմական անցյալն օրինակ է մերօրյա դժվարությունների ու մարտահրավերների դեմ միակամ ու միասնական պայքարելու համար՝ հանուն հայ Եկեղեցու անսասանության»,-ասել է Սրբազան Հայրը:

Եկատերինբուրգի Սուրբ Հովհաննես Մկրտիչ եկեղեցու հոգևոր հովիվ Տեր Արիստակես քահանա Հովհաննիսյանի խոսքով՝ այսօր էլ հոգևորականներն, ի գլուխ ունենալով Վեհափառ Հայրապետին, պայքարում են ստի ու կեղծիքի դեմ՝ հանուն ազգային դիմագծի ու արժանապատվության պահպանման:

Թեմի հոգևորականները և երեցկանայք համատեղ հավաքից հետո շնորհավորել են Նորին Սրբությանը անվանակոչության օրվա առիթով՝ մաղթելով, որ Սուրբ Վարդանանց քաջ ու անվախ ոգով Վեհափառ Հայրապետն առաջնորդի աշխարհասփյուռ հայությանը՝ ի բարօրության Մայր Եկեղեցու և նվիրական հայրենիքի: