Փաշինյանի ընտանիքը դեռ «Կինոհայրենիքի» տանն է գրանցված

Դեռևս 2024թ-ի սկզբին հայտնի դարձավ, որ Նիկոլ Փաշինյանը վաճառել է «Հայրենիք»-ի իր բնակարանը։ Սակայն ընտրողների ռեգիստրում Փաշինյանի տվյալները որոնելիս դեռևս պահպանված են այդ հասցեով գրանցման տվյալները։ Բացի Նիկոլ Փաշինյանից մինչև այժմ ըստ ԿԸՀ կայքի այդ հասցեում են գրանցված նաև Փաշինյանի զոքանչը՝ Կիմա Մկրտչյանը, աներձագը՝ Հրաչյա Հակոբյանը, Աննա Հոկոբյանը և դուստրերը։ 

ԿԸՀ մամուլի քարտուղար Սեդա Ղուկասյանը, անդրադառնալով «Հրապարակ»-ի հարցին, թե ե՞րբ և ի՞նչ հաճախականությամբ են թարմացվում ընտրողների ռեգիստրի առկա տվյալները, հայտնեց․ «Տարին 2 անգամ է թարմացվում, նոյեմբերին և հունիսին, սակայն տվյալների թարմացումը կարգավորվում է ՆԳՆ միգրացիայի և քաղաքացիության ծառայության կողմից»։ 

ՆԳՆ ոստիկանությունից էլ մեր հարցին ի պատասխան հայտնեցին, որ հարցը կարգավորվում է Ընտրական օրենսգրքով։ Մասնավորապես 13-րդ հոդվածի 2-րդ մասով սահմանվում է․ «Ընտրողների նախնական ցուցակը՝ ըստ ընտրական տեղամասերի, քվեարկության օրվանից 40 օր առաջ, Ազգային ժողովի արտահերթ ընտրությունների դեպքում՝ 20 օր առաջ, իսկ ընտրողների վերջնական ցուցակը՝ ըստ ընտրական տեղամասերի, քվեարկության օրվանից 7 օր առաջ տեղադրվում է Կենտրոնական ընտրական հանձնաժողովի և Հայաստանի Հանրապետության ներքին գործերի նախարարության համացանցային կայքերում՝ ներբեռնելու հնարավորությամբ: Ընտրողների նախնական և վերջնական ցուցակները՝ որոնման հնարավորությամբ, պետք է պարունակեն տեղեկատվություն ընտրողի անվան, ազգանվան, հայրանվան (հայրանունը՝ համապատասխան անձը հաստատող փաստաթղթերում առկայության դեպքում), ծննդյան օրվա, ամսվա, տարեթվի, հաշվառման հասցեի, քվեարկության օրվա և ժամանակի, ընտրողի ընտրական տեղամասի համարի և տեղամասային կենտրոնի հասցեի մասին»:

Այս բնակարանում գրանցված չէ Աշոտ Փաշինյանը, ով ի դեպ դեռևս նախորդ տարի էր մամուլը գրել, որ որևէ հասցեում գրանցված չէ, մինչև այժմ գրանցման հասցե չունի։

Հատկանշական է, որ Հրաչյա Հակոբյանը, համաձայն նախորդ տարի հայտարարագրի, թվով 8 անշարժ գույքի սեփականատեր կամ համասեփականատեր է, որից մեկը գնել է հաշվետու ժամանակահատվածում։ Ընդ որում 2-ը Ձորաղբյուրում գտնվող առանձնատներ են, որոնց միանձնյա սեփականատերն է, 2-ը՝ Շենգավիթ վարչական շրջանում գտնվող բնակարաններ, որտեղ համասեփականատեր է։ Սակայն նա և մայրը ևս փեսայի հետ նույն բնակարանում են գրանցված։

Մենք ընտրություններից 40 օր առաջ էլ կստուգենք Փաշինյանի եւ նրա մերձավորների գրանցման հասցեները:

«Հրապարակ օրաթերթ»