Ռուսաստանցի գործարարը Փաշինյանին թանկարժեք նվեր է հանձնել. որքա՞ն արժե այն

Նիկոլ Փաշինյանը 400.000 դրամ արժողությամբ թեյի սպասքի հավաքածու է նվեր ստացել։ «Փաստինֆո»-ի հաղորդմամբ՝ այս մասին Փաշինյանը ներկայացրել է ԿԿՀ-ի Հանրային պաշտոն զբաղեցնող անձի կամ հանրային ծառայողի նվերների հաշվառման ձևաթղթում։

Նվերը Փաշինյանը ստացել է ՌԴ գործարար Վլադիմիր Եվտուշենկովից հունվարին, երբ Փաշինյանն ընդունել էր վերջինիս։

Հիշեցնենք, որ հանդիպման ընթացքում մտքեր են փոխանակվել ՀՀ-ում տնտեսության ընդհանուր զարգացումների, ինչպես նաև պետություն-մասնավոր հատված փոխգործակցության շուրջ։

Նշենք, որ «Երկնագույն պսակ» թեյի սպասքի հավաքածուն պատրաստված է «Գժել» ասոցացիայի կողմից եզակի օրինակով, բարձրագույն ճենապակուց է, ոսկեզօծ։

ԿԿՀ-ն գնորոշումն իրականացրել է համանման ապրանքների արժեքի վերաբերյալ ինտերնետային տիրույթում առկա տվյալների հաղորդման արդյունքում։

Հիշեցնենք՝ «Հանրային ծառայության մասին» օրենքի 29-րդ հոդվածի համաձայն՝ հանրային պաշտոն զբաղեցնող անձանց և հանրային ծառայողների համար թույլատրելի են այն նվերները, որոնք տրվում են պետական կամ պաշտոնական այցերի, միջոցառումների, ինչպես նաև աշխատանքային այցերի ժամանակ, հրապարակային միջոցառումների ընթացքում սովորաբար տրվող նվերները, ինչպես նաև ծառայողական օգտագործման նպատակով անվճար տրամադրվող նյութերը, կրթաթոշակները, դրամաշնորհները կամ նպաստները՝ տրամադրված հրապարակային մրցույթի արդյունքով՝ մյուս դիմորդների նկատմամբ կիրառվող նույն պայմաններով կամ այլ թափանցիկ գործընթացի միջոցով, ինչպես նաև օտարերկրյա պետությունների կամ միջազգային կազմակերպությունների կողմից տրվող արարողակարգային նվերները։

Միաժամանակ, եթե հանրային պաշտոն զբաղեցնող անձի կամ հանրային ծառայողի կողմից ստացված և սույն հոդվածի 3-րդ մասի 1-ին, 2-րդ, 4-րդ և 6-րդ կետերով նախատեսված նվերների արժեքը գերազանցում է 60,000 դրամը, ապա դրանք համարվում են պետական կամ համայնքային սեփականություն և հաշվառվում են որպես այդպիսիք։ Հանրային պաշտոն զբաղեցնող անձինք և հանրային ծառայողները պարտավոր են այդ նվերները կառավարության սահմանած կարգով հանձնել պետությանը կամ համայնքին։