Եթե թմբուկ եք․․․

Այս օրերին հիրավի քաջություն է պետք՝ հայտարարելու, որ դու, չգիտեմ ինչ խոչընդոտներ հաղթահարելուց հետո, իրավունք ես ձեռք բերել՝ տեղ զբաղեցնելու ՔՊ-ի նախընտրական ցուցակում: Վերջին օրերին այդպիսի մի քանի հայտարարություններ աչքովս ընկան, իսկ թեկնածուներից մեկն էլ այնքան հանդուգն էր գտնվել, որ ՔՊ-ի շտաբի պետի տեղակալ (տեղակա՞լ) Վահագն Ալեքսանյանին թույլ էր տվել հրապարակել իրենց համատեղ լուսանկարը: Հներից էլ կան, բայց նաեւ նոր դեմքեր կան, որոնք դեռ լավ չեն պատկերացնում ՔՊ-ի ցուցակում հայտնվելու տխուր հետեւանքները:

Ես ամենեւին էլ չեմ սպառնում այդ մարդկանց: Պարզապես կուզենայի, որ նրանք նախապես իմանան, որ ՔՊ-ի ցուցակ ընկնելը հավասարազոր է իրենց ունեցած մասնագիտությունները դավաճանի, խաբեբայի, հողատուի, գործակալի, աղանդավորի մասնագիտությունների հետ փոխելուն: Գալով ՔՊ-ի ցուցակ՝ գալիս եք Ալեն, Ռուբեն Ռուբինյան, Վահագն Ալեքսանյան, Հայկ Կոնջորյան, ինչու ոչ՝ Արարատ Միրզոյան, Վահագն Խաչատուրյան, Անդրանիկ Քոչարյան դառնալու: Բա ձեզ պե՞տք ա… Էլ չեմ ասում, որ մեծ ֆինանսական բեռի տակ եք ընկնելու, եթե բախտներդ բերի եւ ստուգարքը հանձնելուց հետո դառնաք «ՔՊ-ի ցուցակի թեկնածու»: Ձեզ պե՞տք ա՝ 1.5 միլիոն փող տաք, որ, ենթադրենք, Ռոմանոս Պետրոսյանից մի համար վերեւ լինեք: Բայց, ասեմ, կամքը ձերն է… Եթե որոշել եք Ռոմանոս Պետրոսյան դառնալ, ես ոչինչ անել չեմ կարող:

Գոնե գիտե՞ք, թե ինչ ստուգարք եք հանձնելու: Առաջին կետով ձեզնից պահանջելու են «սրտիկ» անել: Եթե չկարողացաք՝ տեղում կտրում են: Այնպես որ, այդ վարժությունը շատ պարապեք: Ասում են՝ մի աղջիկ հրաշալի «սրտիկ» է ցուցադրել, բայց, չգիտես ինչու, ոչ թե «սրտիկի» ծակից է նայել Վահագն Ալեքսանյանին, այլ՝ կողքից, կտրել են… Ստուգարքի երկրորդ կետով դիմորդից պահանջվում է դատարկ թմբուկ երեւալ: Դե գիտեք, երեւի, որ ՔՊ-ն «կրթվելը նորաձեւ է» շարժումից հետո նոր շարժում է սկսել՝ «թմբուկ լինելը գիրք կարդալուն հավասար բան է» խորագրով: Դուք պետք է ապացուցեք, որ իսկապես դատարկ թմբուկ եք եւ ՔՊ ցուցակի հետ կապված ավելորդ տեսլականներ չունեք: Մի հատ խփում են, ու նայած թե ինչ ձայն դուրս կգա ձեր միջից, որոշում են՝ ներառե՞լ ձեզ ցուցակում, թե՞ ոչ: Եվ ստուգարքի 3-րդ՝ ամենահեշտ պահանջը. պետք է գոնե մեկ անգամ Աստվածաշունչը կարդացած լինեք մինչեւ վերջ: Սերտել եք, թե ոչ՝ էական չէ: Նույնիսկ ավելի լավ է սերտած չլինեք, որովհետեւ ՔՊ-ի առաջնորդն արդեն սերտել է, եւ դա բավական է ասելու համար, որ նրա բոլոր «հետեւորդներն» են սերտել: Աստվածաշնչի հետ կապված բոլոր հարցերն աշխատակազմի ղեկավար Արայիկ Հարությունյանն է տալիս: Վահագն Ալեքսանյանին չեն վստահում, որովհետեւ սա մի անգամ, իբր ուզեցել էր Վեհափառին բան ասել, քրիստոնեության մեջ ինչ կար-չկար, խառնել էր իրար, թե բա՝ Վեհափառն ուզում է մեր Եկեղեցու անունը փոխել: Թե սրա այդ խոսքի վրա ինչ աղմուկ բարձրացավ ՖԲ-ում, նկարագրելու չէ: Մի խոսքով, ինչպես պայմանավորվեցինք, Արայիկ Հարությունյանին համարձակ պատասխանում եք, որ Աստվածաշունչը ծայրից ծայր կարդացել եք ու ոչինչ չեք հիշում:

Ստուգարքին հաջորդող քայլերի մասին վերեւում արդեն ակնարկեցի… Մտնում եք ՖԲ, տեղադրում արդեն մշակված տեքստը՝ ՔՊ ցուցակում ընդգրկվելու ձեր հայտի ընդունման մասին, եւ սպասում քյոհնա ՔՊ-շնիկների քվեարկության արդյունքներին՝ վերցնե՞լ ձեզ ցուցակ, թե՞ մերժել: Ի դեպ, շատ հանգիստ սպասել էլ պետք չէ: Մի հատ շուրջներդ նայեք եւ տեսեք, թե ինչ հանրահայտ ՔՊ-շնիկներ ու «հեղափոխականներ» են «կտրվում» ստուգարքից եւ դուրս մնում ՔՊ ցուցակից: Ներկուսակցական կոռուպցիան հո պոզով-պոչով չի՞ լինում: Վոժդն է այնտեղ ամեն ինչ որոշում, իսկ եթե կուսակցությունում «վոժդ» կա, դա արդեն ինքնին կոռուպցիա է:

Չգիտեմ, այս հոդվածն ինչ-որ չափով կօգնի՞ մեր քաղաքացիներին՝ ՔՊ ցուցակ մտնելուց առաջ լավ մտածել կամ, ընդհակառակը, ռիսկով գնալ եւ դիմել ՔՊ-ին՝ ուսապարկ գրվելու համար: Ինձ համար ընդունելի է այն որոշումը, որ կկայացնի քաղաքացին: Իմ գործը չկողմնորոշվածներին նախազգուշացնելն էր:

Էդիկ Անդրեասյան

«Հրապարակ օրաթերթ»