Գազայի հատվածի և Եգիպտոսի սահմանին գտնվող Ռաֆահի անցակետը բացվել է որոշ սահմանափակումներով

Գազայի հատված-Եգիպտոս սահմանին գտնվող Ռաֆահի անցակետը պաշտոնապես վերսկսել է իր գործունեությունը գրեթե մեկ տարի փակ մնալուց հետո։ «Արմենպրես»-ի փոխանցմամբ՝ այս մասին հայտնում է The Times of Israel-ը։

Փետրվարի 1-ին անցակետում, որտեղ տեղակայված է Պաղեստինի ներկայացուցիչների և Եվրամիության դիտորդների խումբ, անցկացվել է համակարգերի ստուգման և փորձարկման օր։

Անցակետը բաց է միայն Գազայի պաղեստինցի հետիոտների, այլ ոչ թե օգնություն մատակարարող բեռնատարների համար։

Դեռևս հստակ չէ, թե քանի պաղեստինցի է մինչ այժմ անցել սահմանային անցակետով, չնայած կանխատեսվում է, որ անցակետի բացման առաջին օրերին թիվը սահմանափակ կլինի։

Գազայի հատված մուտք գործել կամ անկլավից դուրս գալ ցանկացող բոլոր պաղեստինցիները պետք է ստանան Եգիպտոսի հաստատումը, և Եգիպտոսը պետք է անուններն ուղարկի Իսրայելի Շին Բեթ ներքին անվտանգության ծառայությանը՝ թույլտվություն ստանալու համար։

Իսրայելը հեռակա կարգով կհսկի Գազայի բնակիչների ելքը դեպի Եգիպտոս։ Կառավարման սենյակից իսրայելցի սպաները դեմքի ճանաչման ծրագրի միջոցով կստուգեն, որ Գազայից դուրս եկողների անունները ներառված լինեն հաստատված ցանկում, և կբացեն անցակետի դարպասը։

Սակայն Եգիպտոսից Գազա մուտք գործելը կներառի Իսրայելի կողմից անվտանգության ստուգում: Այդ պաղեստինցիները կժամանեն Իսրայելի պաշտպանության բանակի անցակետ՝ Ռաֆահի անցակետով անցնելուց հետո: Միայն դրանից հետո նրանց կթույլատրվի շարունակել ճանապարհը դեպի Գազայի՝ ՀԱՄԱՍ-ի կողմից վերահսկվող տարածքներ:

Չնայած անցակետի վերաբացմանը, Իսրայելը դեռևս հրաժարվում է թույլատրել օտարերկրյա լրագրողների մուտքը Գազայի հատված:

Al Jazeera-ի փոխանցմամբ՝ Եգիպտոսի առողջապահության նախարարության կողմից տարածված հայտարարության մեջ նշվում է, որ երկրի 150 հիվանդանոցներ պատրաստ են ընդունել պաղեստինցի հիվանդների և վիրավորների, որոնք պետք է տարհանվեն Գազայից Ռաֆահի անցակետով։

ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը X-ում գրառման մեջ Ռաֆահի անցակետի բացումը դրական քայլ է որակել՝ հավելելով, որ հանձնաժողովի հատուկ առաքելությունն այնտեղ է՝ սահմանային անցակետերի գործողությունները վերահսկելու և պաղեստինցի սահմանապահներին աջակցելու համար։

Անցակետը փակվել էր 2025 թվականի մարտին՝ հունվարին կնքված հրադադարի խախտումից հետո։