Դիլիջանի ՔՊ-ական համայնքապետին մեղադրում է 5 հազար դոլար «քցելու» մեջ․ Հրապարակ

Դիլիջանի բնակչուհի Նանա Հակոբյանը ՏիկՏոկում որպես «Նանո 7176» օգտատեր 2 տեսանյութ է հրապարակել, մեկում ինքը չի երևում, արդուկ է անում ու խոսում, մյուսում ընկույզի պատկերի ներքո հնչում է նրա խոսքը: Նանա Հակոբյանը տեսանյութերում պատմել է իրենից 5 հազար դոլար «քցելու» մեջ։ Նա պահանջում է վերադարձնել իր 5 հազար դոլարը, ասելով, որ այդ գումարը վերադարձնելու համար ինքը դիմելու է իրավապահներին, նաև՝ գողականների օգնությանը։

Նա ոմն «Դավոյի» մեղադրում է իր տված 5 հազար դոլարով քիթը վիրահատելու մեջ, նաև մեղադրանք է ներկայացնում` փայտ ծախելով  հարստանալու, անտառները հրդեհելու մեջ։ Տեսանյութերից պարզ է, որ խոսքը վերաբերում է պաշտոնյայի, ով Նանա Հակոբյանի խոսքերով՝ իր գալուց հետո քաղաքացիների առաջ իր պայմաններն է դրել: Նանա Հակոբյանի խոսքից կարելի է ենթադրել, որ խոսքը Դիլիջանի ՔՊ-ական համայնքապետ Դավիթ Սարգսյանի մասին է, ով համայնքի ղեկավար ընտվելուց հետո քիթը պլաստիկ վիրահատության է ենթարկել։

Նա պատմում է, որ ինքը Դավոյին 5 հազար դոլարը տվել է այլ անձի ներկայությամբ, բայց Դավոյին ավելի շատ փող են տվել արտերկրում բնակվող իր հարուստ բարեկամները, որոնք չեն բողոքում։ Իրավապահները պետք է կաշառքի մասին համացանցում արված այս հայտարարությանը ընթացք տան, այդ առթիվ  օբյեկտիվ քննություն կատարեն, սակայն դա հազիվ թե տեղի ունենա, որովհետև Դիլիջանի համայնքապետ Դավիթ Սարգսյանը ՔՊ-ական է, մասնակցում է Նիկոլ Փաշինյանի մասնակցությամբ կեղծ, զեղչված պատարաներին։ Դիլիջան քաղաքից հայտնեցին, որ Նանա Հակոբյանը Դիլիջանում հայտնի Ալադի աղջիկն է, Ալադը խորհրդային տարիներին  Ռուսաստանից մեծ քանակությամբ տախտակ է ներկրել Հայաստան, եղել է մեծահարուստ։

hraparak.am