«Հրապարակ». Ովքեր են մուծվել պետությանը քրեական հետապնդումների շրջանակում

Գլխավոր դատախազության տնտեսական գործունեության դեմ ուղղված հանցագործությունների գործերով վարչության հսկողության ներքո քննվող քրեական վարույթներով ամփոփվել են 2025 թվականի ընթացքում պետությանը պատճառված վնասի վերականգնման ցուցանիշները, եւ, ինչպես հաղորդում է դատախազությունը, 80 միլիոն ԱՄՆ դոլար վնասի վերականգնում է ապահովվել: Գլխավոր դատախազությունից հայտնում են. «Վերականգնված վնասի ցուցանիշներում ներառված է նաեւ ռազմավարական նշանակություն ունեցող՝ 1 միլիարդ 755 միլիոն դրամ արժեքով ընկերությունը: Ավարտված քրեական վարույթներով վերականգնվել է պետությանը պատճառված վնասից 15 միլիարդ 440 միլիոն դրամ, որը համարժեք է շուրջ 41 միլիոն 174 հազար ԱՄՆ դոլարին: Համեմատության համար նշենք, որ նշված ցուցանիշը շուրջ 2,4 միլիարդ դրամով գերազանցում է 2024 թվականի վնասի ցուցանիշը»:

Առավել ուշագրավ է այն անձանց ցանկը, ովքեր տարբեր քրեական գործերի շրջանակներում վնասի վերականգնում են արել` պետությանը վճարելով ինչ-որ գումարներ: Դատախազությունը հաղորդում է. «Պետությանը պատճառված վնասի վերականգնումներ են կատարվել Սուրբ Աթոռում ՀՀ արտակարգ եւ լիազոր նախկին դեսպան Միքայել Մինասյանի, ՀՀ նախկին վարչապետ Հովիկ Աբրահամյանի եղբոր, ՀՀ ԱԺ նախկին պատգամավոր Արագած Ախոյանի եղբոր եւ նրանց հետ առնչություն ունեցած անձանց կողմից կատարված հանցանքների վերաբերյալ քննվող, ՀՀ ԱԺ նախկին պատգամավոր Կարո Կարապետյանի ընտանիքի անդամների, նախկին պատգամավորներ Նահապետ Գեւորգյանի, Հարություն Փամբուկյանի եւ նրանց ընտանիքի անդամների կողմից կատարված հանցանքների վերաբերյալ քննվող եւ մի շարք այլ քրեական վարույթների շրջանակներում»։

Իհարկե, 80 միլիոն դոլարը մեծ գումար չէ, որպեսզի համեմատության եզր ունենանք, բավական է հիշել, որ, ըստ հրապարակային տվյալների, ԱՆԻՖ հիմնադրամի՝ ՀՀ բյուջեին պատճառած վնասը կազմել է 63 միլիոն դոլար: