Բա ի՞նչ եղավ ձեր խոստացած 350.000 աշխատատեղը. անգամ հայտնի սուտասան Ստեփանի ճնշումն է բարձրացել. Հրանտ Բագրատյան

ՀՀ նախկին վարչապետ Հրանտ Բագրատյանը գրել է.

«Սամվել Կարապետյանի «Ուժեղ Հայաստան» շարժումը հրապարակել էր իր ծրագրային դրույթները։ Մասնավորապես, նախատեսված է 300.000 նոր աշխատատեղերի ստեղծում։ Դրա հաջորդ օրը, հունվարի 21-ին, ԱԺ-ում ՔՊ-ականները հայտարարեցին՝ պահ, պահ 300.000, մենք (այսինիքն՝ ՔՊ-ականները) 350.000 ենք ստեղծել։

Դրանից հետո հունվարի 21-ի ուշ երեկոյան, ենթադրվում է, որ կտրուկ բարձրացել է ՀՀ հայտնի սուտասան Ստեփանի ճնշումը (Վիճակագրական կոմիտեի նախագահ, նախագահ Ստեփան Մնացականյանի,-168.am)։ Նույնիսկ նա, ով համարվում է ՀՀ սուտասանների չեմպիոնը, զայրացել է. ի՞նչքան կարելի է նման ստեր ասել։

Եվ իրոք, ստի ոտքերը կարճ են։

Եվ, այսպես, 2017թ. ՀՀ տնտեսության մեջ զբաղվածների թիվը եղել է 1011.7 հազ մարդ։ 2024-ին այդ թիվը կազմել է 1176.1 հազ. մարդ։ Այն է, 7 տարում զբաղվածների (այսինքն՝ աշխատողների) թիվն ավելացել է…164.4 հազ. -ով։ 350.000 թիվ պարզապես չկա։

Հիմա, ի՞նչու 2024 թվական։ Միգուցե 2025-ին զբաղվածների թիվը կտրուկ ավելացե՞լ է։ Բանն այն է, որ այս պահին ունենք 2025թ. զբաղվածների թիվը 3-րդ եռամսյակի դրությամբ։ Տարեկան թվերը դեռ չկան։ Համենայն դեպս, չարախոսներից խուսափելու համար նշենք, որ 2025թ. 1-ին եռամսյակում զբաղվածների թիվը եղել է 1159.4 հազ. մարդ, 2-րդ եռամսյակում՝ 1190.7 հազ մարդ և երրորդում՝ 1210 հազ մարդ (2024-ին, համապատասխանաբար, եղել է՝ 1116.4, 1190.9 ու 1211.4 հազար մարդ)։

Ասել կուզի, 2025-ի զբաղվածների թիվը 2024-ի 1176.1 հազար մարդ թվից շատ չի տարբերվելու։ Ավելի հետաքրքիր է գործազուրկների թիվը։ 2017-ին այն եղել է 219 հազ մարդ։ 2024-ին 181.2 հազ մարդ, իսկ 2025-ի հոկտեմբերին՝ 161.3 հազ. մարդ։ Այսինքն, գործազուրկների թիվը 8 տարում (ավելի ճիշտ՝ 7 տարի 9 ամսում) պակասել է… 57.7 հազար մարդով։ Բա ի՞նչ եղավ ձեր 350.000 աշխատատեղը»։