Պաշտոնյաների ազգակիցների մասնակցությունը պետական գնումներին կսահմանափակվի

Կառավարությունը ընդունեց «Գնումների մասին» օրենքում փոփոխություններ ու լրացումներ կատարելու առաջարկը, որով նախատեսվում է սահմանափակել պետական բարձրաստիճան պաշտոնյաների և նրանց ընտանիքի անդամների հետ փոխկապակցված անձանց մասնակցությունը գնման գործընթացում։

Ֆինանսների նախարար Վահե Հովհանիսյանը նշեց, որ նոր մոդելը սահմանում է ազդեցության մակարդակներ, որտեղ ամենաբարձր օղակի պաշտոնյաների, այդ թվում՝ Հանրապետության նախագահի, վարչապետի և ֆինանսների նախարարի ազգակիցների ընկերություններին արգելվում է մասնակցել որևէ պետական գնման գործընթացի։

Ըստ այդմ՝ փոխկապակցված անձինք են համարվում պաշտոնյայի ամուսինը, պաշտոնյայի կամ նրա ամուսնու զավակը, ծնողը, քույրը, եղբայրը, ինչպես նաև համատեղ բնակվող անձը։ Փոխկապակցված է համարվում այն ընկերությունը, որտեղ նշված անձինք տիրապետում են կանոնադրական կապիտալի կեսից ավելիին կամ իրավունք ունեն կանխորոշելու ընկերության որոշումները։

«Մասնակցության պայմանները սահմանվում են ըստ ազդեցության հետևյալ 4 մակարդակների.

Առաջին մակարդակ. ՀՀ նախագահը, վարչապետը, փոխվարչապետերը, ֆինանսների նախարարը, և վերջինիս այն տեղակալը, որ համակարգում է գնումների ոլորտը, այս դեպքում փոխկապակցված ընկերությունները չեն կարող մասնակցել որևէ գնման գործընթացի։
Երկրորդ մակարդակ. Վարչական և քաղաքական պաշտոն զբաղեցնող անձինք՝ բացառությամբ ԱԺ պատգամավորների և համայնքի ավագանու անդամների, Գլխավոր դատախազը և նրա տեղակալները, քննչական մարմինների ղեկավարները և նրանց տեղակալները, գլխավոր քատուղարները։ Այս դեպքում փոխկապակցված ընկերությունները չեն կարող մասնակցել տվյալ պատվիրատուի և վերջինիս կառավարմանը հանձնված առևտրային և ոչ առևտրային կազմակերպությունների կողմից կազմակերպվող գնումների գործընթացին։
Երրորդ մակարդակ. անկախ պետական մարմինների և ինքնավար մարմինների անդամները, այդ թվում՝ ԿԲ նախագահը և նրա տեղակալները, ՄԻՊ-ը։ ԱՅս դեպքում փոխկապակցված ընկերությունները չեն կարող մասնակցել տվյալ պատվիրատուի կողմից գնման գործընթացներին։

Չորրորդ մակարդակ. 1-3 մակարդակներում չներառված չներառված պաշտոնյաները։ ԱՅս դեպքում փոխկապակցված անդամները կարող են մասնակցել գնման գործընթացերին, պամանով, որ եթե պաշտոնյան ներառված է մրցույթի հանձնաժողովի կազմում, ապա պետք է հայտնի ինքնաբացարկ և դուրս գա հանձնաժողովի կազմից»։
Նա նաև տեղեկացրեց, որ ընկերությունների կողմից փոխկապակցվածության արգելքի խախտման դեպքերը կքննվեն Կոռուպցիայի կանխարգելման հանձնաժողովի կողմից։ Խախտման դեպքերի արձանագրման դեպքում պատվիրատուն պայմանագիրը միակողմանի կլուծի։

Կարգավորումները ուժի մեջ կմտնեն 2027 թ-ի հունվարի 1-ից։