Նախազգուշացում՝ԵՄ-ից դուրս գալու հետևանքների մասին

Ինչպես տեղեկացնում է РИА Новости գործակալությունը,  Ֆրանսիայի էկոնոմիկայի նախարար Էմանուել Մակրոնը Լոնդոնին զգուշացրել է Եվրամիությունից Բրիտանիայի դուրս գալու դեպքում բրիտանա-ֆրանսիական հարաբերությունների կտրուկ փոփոխության մասին։   «Խոսքը Մեծ Բրիտանիայի հետ փախստականների հարցով ձեռք բերված համաձայնության խզման մասին է, ինչպես նաև երկրների միջև առևտրա-տնտեսական կապերում խոչընդոտների ստեղծման։ Նույն օրը, երբ հարաբերությունները խզվեն, ներգաղթյալներն այլևս Կալեում չեն լինի»,-ասել է Մակրոնը  Financial Times թերթին տված հարցազրույցում։ Խոսքը 2003 թվականին փախստականների հոսքը նվազեցնելուն ուղղված երկկողմ համաձայնագրի մասին է։   Ֆրանսիացի նախարարի խոսքով՝ երկիրը կտեղափոխի փախստականների ճամբարը, և դա կդառնա «կարմիր գորգով ճանապարհ» դեպի Մեծ Բրիտանիա փախստականների հոսքի համար։   Նախարարը նաև նշել է, որ ԵՄ-ից Մեծ Բրիտանիայի դուրս գալով ինքն ակնկալում է նաև Լոնդոնից մի շարք արտասահմանյան ֆինանսական ծառայությունների դուրսբերում։   « ԵՄ-ից դուրս գալը Մեծ Բրիտանիային կթուլացնի ռազմական ու տնտեսական առումներով։ Եվրամիությանն այլընտրանք չի մնում, քան դառնալ իրական ռազմական ու դիվանագիտական ուժ»,-ասել է Մակրոնը։   Եվրամիությունից Մեծ Բրիտանիայի հնարավոր դուրս գալու մասին հանրաքվեն կկայանա հունիսի 23-ին։