«Հիմնադիր խորհրդարան»-ի անդամից վերցրել են հեռախոսը

«Հիմնադիր խորհրդարան»-ի անդամ Վիգեն Նազարյանը երեկ ԱԱԾ-ում հարցաքննվելուց հետո ազատ է արձակվել: «Հուսով եմ, որ այդ գործի շրջանակներում իմ վստահորդն այլեւս չի մասնակցի, ես չգիտեմ գործի հետագա քննությունը ինչպես կընթանա , արդյոք զարգացումներ կլինեն, եւ նա դատարան կհրավիրվի` ես չեմ կարող ասել: Հույս ունեմ, որ Վիգեն Նազարյանին ԱԱԾ-ն չի անհանգստացնի»,- «Ա1+»-ին ասաց նրա պաշտպան Արայիկ Պապիկյանը: Վիգեն Նազարյանը ԱԱԾ է հրավիրվել որպես վկա մի գործի շրջանակներում հարցաքննվելու համար: «Որքան ես հասկացա նաեւ հարցաքննության ժամանակ, ենթադրյալ հանցագործության հետ նա որեւէ առնչություն չունի»: Մինչեւ հարցաքննություն իրականացնելը, Վիգեն Նազարյանի բնակարանում խուզարկություն է կատարվել. «Խուզարկության ժամանակ որեւէ ավելորդ կամ օրենքից դուրս գործողություն չի կատարվել, ամբողջ պրոցեսը կատարվել է օրենքով սահմանված կարգով, եւ որեւէ դժգոհություն կամ խնդիր չի հայտնել դրա հետ կապված: Բնակարանի հարցաքննության ժամանակ այդ ենթադրյալ հանցագործությանն առնչվող որեւէ իր կամ առարկա նրա բնակարանում չի եղել եւ այդպիսիք չի առգրավվել նրա բնակարանից»,- ավելացրեց Արայիկ Պապիկյանը: Վիգեն Նազարյանից, սակայն, զննության նպատակով վերցվել է հեռախոսը: «Մենք որոշեցինք, որ այսօր այդ զննությունը կկատարվի եւ հեռախոսը կվերադարձվի իրեն»: Առայժմ Վիգեն Նազարյանը ձեռնպահ է մնում որոշակի տեղեկություններ տարածելուց: Պաշտպանն է այդպես խնդրել: «Օրենքի ուժով նախաքննական գաղտնիքի հրապարակման խոչընդոտ կա, եւ այս փուլում իրավունք չունենք որեւէ տեղեկություն տարածել»,- նշեց փաստաբանը: Արայիկ Պապիկյանը միաժամանակ շեշտում է՝ իրենք այդքան տեղեկատվության չեն տիրապետում, քանի որ գտնվում են վկայի կարգավիճակում: