«Ծառուկյան դաշինքը որևէ պաշտոնի համար չի գնա համատեղ կառավարման». Տիգրան Ուրիխանյան (video)
«Քաղաքական առումով՝ տարին առանձնացավ յուրահատուկ ընտրություններով, բացի այդ որևէ ուշագրավ բան չեմ նկատել»,- «Հայելի» ակումբի այսօրվա ասուլիսում ասաց «Բարգավաճ Հայաստան» կուսակցության մամուլի քարտուղար Տիգրան Ուրիխանյանը: Նա հույս հայտնեց, որ հետագա չորս և ավելի տարիներին այս գումարման խորհրդարանը որակապես ավելի մեծ և տարբերվող արդյունք կտա: Նաև կարևորեց այն հանգամանքը, որ խորհրդարանը, օժտված լինելով նոր սահմանադրության հավելյալ լիազորություններով, իր վերահսկողությունը խստագույն և ադեկվատ կերպով պահի իշխանության և մյուս գերատեսչությունների վրա, այսինքն՝ բացի օրինաստեղծ գործունեություն ծավալելուց, զբաղվի նաև արդյունավետ վերահսկողություն իրականացնելով: Խոսելով անցնող տարվա ձեռքբերումներից և բացթողումներից՝ բանախոսը նշեց. «Երբ երկրում առկա խնդիրները առանձնապես լուծումներ չեն ստացել, խոսել ձեռքբերումներից մի տեսակ վերամբարձ կստացվի: Ամենամեծ հաջողությունը այն կլինի, որ Հայաստանի քաղաքացին ապրի ավելի լավ, ունենա լավ տրամադրվածություն ապագայի նկատմամբ: Դրական եմ համարում «Հայաստան-Եվրամիություն համաձայնագրի» ստորագրումը: Բացթողումները բոլոր այն չիրականացված քայլերն էին, որոնք կարելի էր անել դեպի լավը գնալու համար և այն իրականացված քայլերը, որոնք չեն տարել դեպի լավը»: Անդրադառնալով «Ծառուկյան դաշինքի» և «ՀՀԿ-ի» հնարավոր կոալիցիայի մասին շրջանառվող լուրերին՝ Ուրիխանյանը նշեց, որ իրենք երբևէ չեն խուսափել կառավարման պատասխանատվություն ստանձնելուց և վստահեցրեց, որ որևէ պաշտոնի համար «Ծառուկյան դաշինքը» երբևէ չի գնացել և չի գնալու այդպիսի քայլի: «Եթե երբևէ ստեղծվի այնպիսի իրավիճակ, որ մենք կարողանանք մեր սեփական ուրույն քաղաքական կուրսը վարելով իրականացնել մեր ընտրողների սպասելիքները, ապա մենք պատրաստ ենք քննարկումների գնալ»,-եզրափակեց նա:
Հետևեք մեզ Viber-ում
