Հայաստանում ամբողջ քաղաքական գործընթացը կառուցվում է առևտրային, գործարքային տրամաբանության վրա

Քաղաքական մեկնաբան Հակոբ Բադալյանի կարծիքով Հայաստանում ամբողջ քաղաքական գործընթացը կառուցվում է պարզ առևտրային, գործարքային տրամաբանության վրա։ Բադալյանի համոզմամբ՝ ստեղծված իրավիճակում արմատականությունը խնդրի լուծում չէ, այլ խնդիրներ է առաջացնում, այն էլ՝ ոչ այնքան իշխանության, որքան՝ պետության համար. «Մենք տեսանք, որ նախորդ տարվա հուլիսի դեպքերից ամենաշահածը և ամենաքիչ տուժածը դուրս եկավ իշխանությունը։ Այսինքն՝ եթե նույնիսկ մեխանիկորեն նայենք, ապա, իհարկե, արմատական տրամադրությունների ռիսկը մեծանում է, բայց չեմ կարծում, որ հասարակությունն այս ուղղությամբ ինչ-որ բաներ պետք է փնտրի, որովհետև լուծումներն ամենևին այստեղ չեն»։ Ըստ նրա՝ կարելի է հասնել լարված իրավիճակի, որից դարձյալ իշխանությունն է շահած դուրս գալու, որովհետև ռեսուրսներն ամբողջությամբ իշխանության ձեռքին են։