Կարտաքսեն Բաքու

Թուրքիայի իշխանությունները մտադիր են արտաքսել Ադրբեջանի ընդդիմադիր «Ժողովրդավարական ուժերի ազգային խորհրդի» անդամ, խորհրդարանի նախկին պատգամավոր Գյուլթեքին Հաջիբեյլիին։ Այս մասին նա հայտնել է ֆեյսբուքյան իր էջում։

Հաջիբեյլիին բերման են ենթարկել նոյեմբերի 29-ին Ստամբուլում։ Meydan TV-ի տվյալներով՝ բերման ենթարկվելուց հետո նա գտնվում է վարչական հսկողության տակ՝ «ազգային անվտանգությանը սպառնացող օտարերկրացիներ» կատեգորիայով։

Արտաքսման մասին որոշումն ընդունվել է նախքան դատարանի վճռի կայացումը, ինչը, Հաջիբեյլիի խոսքով, վկայում է այն մասին, որ այն «կրում է ոչ թե իրավական, այլ քաղաքական բնույթ»։ «Ես մինչև հիմա չեմ կարողանում հավատալ, որ մի պետություն, որին ես համարում եմ իմ երկրորդ հայրենիքը և որին միշտ աջակցել ու պաշտպանել եմ իմ քաղաքական գործունեության ընթացքում, կարող է՝ խախտելով իրավունքի և արդարության սկզբունքները, ինձ բռնի ուժով ուղարկել Ադրբեջան, որտեղ ինձ ձերբակալություն է սպառնում», – հայտարարել է նա Թուրքիայի նախագահ Ռեջեփ Թայիփ Էրդողանին ուղղված դիմումում։

Գյուլթեքին Հաջիբեյլին իր հետապնդումը կապում է Ադրբեջանի նախագահի աշխատակազմի 87-ամյա նախկին ղեկավար Ռամիզ Մեհթիևի դեմ հարուցված գործի հետ, որի շրջանակներում ավելի վաղ ձերբակալվել է ընդդիմադիր «Ադրբեջանի ժողովրդական ճակատ» կուսակցության (ԱԺՃԿ) նախագահ Ալի Քերիմլին։ Վերջինս մեղադրվել է իշխանության բռնի զավթմանն ուղղված գործողությունների մեջ։

«Ազատություն» ռադիոկայանի ադրբեջանական ծառայությանը տված հարցազրույցում Հաջիբեյլին ասել է, որ «աբսուրդ» է համարում Ռամիզ Մեհթիևի հետ կապերի մասին մեղադրանքները։