«Իրենց պարտականությունը՝ ձենդ կտրի ասելն ա՞…».սանկցիա`դատախազի նկատմամբ

ՊՊԾ գնդում հանձնվելուց հետո Սասնա ծռերի անդամների հագուստի առգրավման գրավոր ապացույցների հրապարակման ժամանակ մեղադրողը ներկայացրեց նաև Արամ Հակոբյանի հագուստի առգրավման արձանագրությունը, ըստ որի՝ նրա տաբատը պատռված է եղել։ Արամ Հակոբյանը դատարանում հայտարարեց, որ գետնին գցած քարշ են տվել, ոչ մի փոխհրաձգություն չի եղել, պարզապես ինքը փորձել է  օգնել արյունաքամ եղած անձին  , հենց այդ ժամանակ էլ 6-7 հոգով հարձակվել են իր վրա և խոշտանգել։ Մարտիրոս Հակոբյանը՝   Դեդը  փորձում էր պարզել, թե ինչ ապացույցներ են ներկայացվում։ Մեղադրող դատախազ Հակոբ Ենոքյանը նշեց, որ դրանք անտեղի հարցադրումներ են։ Դա առաջացրեց Մարտիրոս Հակոբյանի դժգոհությունը,ում  միացան նաև Սասնա ծռերի մյուս անդամները։ Փոխադարձ մեղադրանքներից և վիրավորանքներից հետո  դատավոր Արթուր Օհանյանը Մարտիրոս Հակոբյանին 3 ժամով հեռացրեց նիստերի դահլիճից և նիստն ընդմիջեց 15 րոպեով։ «Սասնա ծռեր»-ի անդամ Սերգեյ Կյուրեղյանը  դատարանից պահանջեց դահլիճ վերադարձնել Մարտիրոս Հակոբյանին և պատժել մեղադրող դատախազին: Դատավորը նկատեց, որ դատախազները իրենց պարտականություններն են կատարում: «Իրենց պարտականությունը՝ ձենդ կտրի ասելն ա՞…նույն դատախազը նախորդ նիստին Մարտիրոս Հակոբյանին արձագանքեց՝ թուրքը դու ես: Դատախազը ասում ա, որ մենք անիմաստ ենք խոսում:Նա իրավունք չունի նման բան ասել: Եթե մեր ասածի իմաստը չի հասկանում, թող հարցնի՝ կպատասխանենք:Մեղադրողը մեզ վիրավորում է, իսկ Դուք դա թույլ եք տալիս»,- հունից դուրս եկավ Սերգեյ Կյուրեղյանը: Մեղադրող կողմը նշեց, որ Գլխավոր դատախազին դիմելու կարիք չկա, քանի որ իրենք կատարում են իրենց պարտականությունները: Դատավոր Արթուր Օհանյանը նախազգուշական սանկցիա կիրառեց մեղադրող կողմի նկատմամբ: Մարտիրոս Հակոբյանին դատական նիստերի դահլիճ վերադարձնելու միջնորդությունը մերժվեց: