«Հոգևորականներն իրավունք չունեն զբաղվելու քաղաքականությամբ» պնդումը հակաօրինական է ու հակազգային. Վրթանեսյան

Ռազմական փորձագետ Կարեն Վրթանեսյանի ֆեյսբուքյան գրառումը.

Սկսած քպ-ական պաշտոնյաներից, վերջացրած այսպիսի խուրդա քարոզիչներով ու ֆեյքերով համառորեն՝ ամենօրյա ռեժիմով այն թեզն են առաջ տանում, թե «հոգևորականները չպիտի զբաղվեն քաղաքականությամբ»։

Եթե չոր իրավական տեսանկյունից նայենք, ապա դա հակասահմանադրական պնդում է։ Սահմանադրությունում չկա որևէ արգելք հոգևորականների՝ քաղաքականությամբ զբաղվելու մասով։ Միջազգային իրավունքի տեսակետից էլ է այդ պնդումը քաղաքական և քաղաքացիական իրավունքների ոտնահարում։ Այդ իրավունքները ամրագրված են մի շարք միջազգային փաստաթղթերում, որի տակ ստորագրել է Հայաստանը։

Այսօր այդ մասին մանրամասն խոսվեց նաև Քաղաքական իրավունքների հայկական կենտրոնի տարեկան ամփոփիչ միջոցառման ժամանակ։

Նիկոլական քարոզիչները փորձում են տպավորություն ստեղծել, թե իրենք ոչ թե Եկեղեցու վրա են հարձակվում, այլ «միայն քաղաքականությամբ զբաղվող հոգևորականների»։ Սա էլ է քարոզչական կուտ. իրենց խիստ մտահոգում է Եկեղեցու՝ ազգային ինստիտուտ լինելու փաստը։ Ու ժամանակագրորեն եթե նայեք, ապա ակնհայտ է, որ Եկեղեցու դեմ Նիկոլի արշավը սկսվել է դեռևս 2018-ի իշխանափոխության առաջին օրերից։

[Սա իմ միտքը չէ, բայց լրիվ համաձայն եմ.] Եկեղեցին իր ամբողջ պատմության ընթացքում բացի հոգևորից եղել է նաև քաղաքական կառույց։ Ոչ միայն Հայաստանում է այդպես։ Իսկ Հայաստանում առավել ևս Եկեղեցին ազգային-քաղաքական ինստիտուտ է եղել։

Աբսուրդ կլիներ, եթե օկուպացիոն ռեժիմը հազարամյակների պատմություն ունեցող հայկական հայրենիքի մասը հանձներ, իսկ Եկեղեցու սպասավորները լուռ մնային։

Ամփոփեմ. «հոգևորականներն իրավունք չունեն զբաղվել քաղաքականությամբ» պնդումը հակաօրինական է (թե՛ ՀՀ, թե՛ միջազգային իրավունքի տեսակետից)։ Այն նաև հակազգային է։

Կապ չունի, թե դեմքի ինչ վստահ արտահայտությամբ է այդ պնդումն արվում, այն կեղծիք է։