Այնպես է օրհնել, որ 8 տարի է՝ աթոռից պոկել չի լինում… Թե բա՝ զավակ ունի…

Եկեղեցին չգնաց վարչապետի մոտ, վարչապետը գնաց եկեղեցու մոտ: Ասվածի ճիշտն ու սխալը ես էլ չգիտեմ: Ո՞վ ում մոտ գնաց, ո՞վ առաջինն ասաց, որ պիտի այսպիսի բան անել: Եվ, առհասարակ, 2018 թվին մեր մտքով կանցնե՞ր, որ պիտի այսպիսի իրավիճակ ստեղծվեր: Ախր, ամեն ինչ այնքան ներդաշնակ էր մինչ այդ: Ինքը որ դարձավ վարչապետ, առաջինը վազ տվեց կաթողիկոսի մոտ՝ օրհնություն ստանալու: Ճի՞շտ է: Բա որ կաթողիկոսը «կաթողիկոս չէր», ինչո՞ւ վազ տվեց, հը՞: Կարող ա՞ կաթողիկոսը վատ օրհնեց: Այնպես է օրհնել, որ 8 տարի է՝ աթոռից պոկել չի լինում… Թե բա՝ զավակ ունի… Բայց ո՞ր հոգեւոր հովիվը չունի: Հռոմի պապը չունի, Փաշազադեն չունի… Ամենայն հայոց կաթողիկոսը 10 միլիոն զավակ ունի՝ աշխարհով մեկ սփռված, որից մոտ 4 հազարը, դու էլ հետը, ՔՊ-շնիկ է: Ի՞նչ վատ բան կա դրա մեջ: Թե բա՝ պատարագի ժամանակ կաթողիկոսի անունը պետք ա զեղչել: Ինչո՞ւ, դա ի՞նչ ծնողուրացություն է, ինչո՞ւ ես պղտորում հոգեւոր ընտանիքիդ անդորրը: Մատդ մտցրել ես Աստծո գործերի մեջ ու խառնում ես: Բա որ բարկանա՞:

Իմանամ՝ կարող ես Աստծո դեմն առնել, կասեմ՝ հա: Ո՞վ պետք է փրկի քեզ Աստծո պատժից՝ ախրանա՞դ, հետդ պատարագի վազող քնած մանուշա՞կը, որ ՀՀ նախագահ է կոչվում, Ալեն Սիմոնյա՞նը, Հայկ Կոնջորյա՞նը, որ թռչկոտելով էին քայլում կողքովդ, որպեսզի հանկարծ չցեխոտեին ախրանայիդ կոշիկներն ու շալվարները: Գուցե ցիլո՞դ պետք է փրկի քեզ, որ մինչեւ ականջներդ քաշել ես գլխիդ: Մի խոսքով՝ այս պատարագ-շոուից պարզ երեւում է, որ երբ եկեղեցին չի գնում վարչապետի մոտ, վարչապետն է գնում եկեղեցու մոտ: Այսինքն, չի բացառվում, զգում է եկեղեցու կարիքը:
Բայց ինչո՞ւ այսպես գնալ եկեղեցի, ինչո՞ւ ամեն եկեղեցի գնալը դարձնել էշի հարսանիք: Է՛լ կայքերում գրել, է՛լ հեռուստատեսությամբ ցույց տալ, է՛լ քաղաքների ու գյուղերի կյանքը կաթվածահար անել: Ուզո՞ւմ ես պատարագի մասնակցել, մարդ Աստծո, վեր կաց, մյուսների նման գնա եկեղեցի… Աղոթք, երգեցողություն, խրատ՝ գլուխդ կախ լսիր, վեր կաց, խաղաղված հոգով գնա քո տուն: Այլապես ամեն շաբաթվա գլխին հայտարարում ես՝ հաջորդ կիրակի գնալու եմ այսինչ եկեղեցին, պատարագ անեմ ու կաթողիկոսի անունը զեղչեմ: Եվ սկսվում է… Ենթադրում եմ, որ գլխիցդ ձեռ ես քաշել, բայց այնքա՞ն, որ չես էլ զգում, որ դրանով խանգարում ես մյուս քրիստոնյաների անդորրը: Մի քիչ հավաքիր քեզ, այսպես երկար չես ձգի:

Ես դեռ ծախսի մասին չեմ խոսում: Պետբյուջեի հաշվին արդեն քանի՞ «պատարագ» է կազմակերպել, հաշվարկ կա՞: Ասում է՝ եթե թոշակառուին 10 հազար «լրացուցիչ» գումար տանք, չի իմանա ինչպես ծախսել: Էս լուրջ է ասո՞ւմ: Մի հարցնող լինի՝ էդ որ բյուջեի վրա նստած՝ փողերը քամուն ես տալիս, չես մտածո՞ւմ, որ կարելի է այդ գումարներն ավելի արդյունավետ ծախսել, քան այս հիմար պատարագների շարքն է: Կատակ չի, չէ՞, 300-500 մարդ հետեւից գցած եկեղեցիներով պտտեցնելը: Հաշվիր՝ շրջիկ խմբիդ ամեն անդամի 5 հազար տալիս ես, չէ՞, որպես օրապահիկ: Սա քեզ՝ 2 միլիոն 500 հազար: Մի այդքան էլ ախրանկադ է լափում, ճի՞շտ է: Եղավ 5 միլիոն: Գանք Հ1-ի պերսոնալին: Պետրոսն ինչքա՞ն կուտի երկու ժամ տեւող ճամփորդության ընթացքում՝ իր լրագրողներով, օպերատորներով, տեխնիկներով-բանով:

Ամենահամեստ հաշվարկներով՝ մեկ միլիոնը նաղդ է: Ինչքա՞ն փող է դուրս գրում Ալեն Սիմոնյանը ՔՊ-շնիկ պատգամավորների այդ մարզային «այցելությունների» վրա, կամ՝ նախագահականի՞ց ինչքան դուրս գրեցին՝ քնած մանուշակին Գյումրի հասցնելու համար: Աշխատակազմ, նախարարություններ, ԱԱԾ, պարեկների պարս… Մարդ են, ի վերջո, պիտի հաց ուտեն, պարգեւավճար ստանան… Պիտի տեղաշարժվեն նաեւ: Ամեն պիղծ պատարագի մոտ հազար ավտոմեքենա եւ ավտոբուս է մասնակցում: Դրանց վառելիքը հաշվեք: Մեծ մասը 8 լիտրանոց շարժիչներով ջիպեր են: Ու արդեն քանի կիրակի՝ տասնյակ ու հարյուրավոր միլիոններ են վատնում, բայց աչքները թոշակառուի 10 հազարի վրա է: Ուզո՞ւմ եք իմանալ, թե 8 միլիարդ պարտքի 6.5 միլիարդն ուր է… Խնդրեմ, այսպիսի բաների վրա է ծախսվել:
Ես մի առաջարկ ունեմ եւ կարծում եմ, որ այն կնպաստի բյուջեի փողերը զգալիորեն խնայելուն: Միակ պայմանն այն է, որ վարչապետը մնա կառավարության շենքում, եւ եկեղեցին գնա նրա մոտ: Արագացված տեմպերով Ս. Կճոյան անվամբ մի մատուռ սարքենք կառավարության շենքի բակում եւ այնտեղ տեղափոխենք մոտ 10 եպիսկոպոսի, որ ամեն կիրակի պատարագ մատուցեն վարչապետի համար… Աչքից, շառից, փորձանքից հեռու: Վարչապետական պատարագի ժամանակ էլ ժամացույցի զանգերը կտան, մոմ ա, բան ա՝ կվառեն, կգնան իրենց գործին: Իսկ ինչ վերաբերում է կաթողիկոսի անունը զեղչելուն, թող զեղչեն, վարչապետի անունը թող տան, աշխատակազմի ղեկավարի, խոսնակի, դատախազի, ԱԱԾ տնօրենի… ում անունն ուզում են՝ թող տան: Միայն թե այլեւս բոշեքի պես չընկնեն մեր եկեղեցիներն ու չպղծեն, չփչացնեն, չայլանդակեն դրանք՝ իրենց պատկերին ու վարքին համեմատ: Ինչ է՝ կարծում եք, թե «Հայր մերը» կարող է խնդի՞ր առաջացնել: Անհոգ եղեք, ես արդեն խմբագրել եմ այն. «Հայր մեր, որ բնակիս ի դաչայս կառավարութեան»,- այնուհետեւ՝ ինչպես տեքստում: 

ՀԳ. Պետրոս ջան, ախպեր ջան, ք. քն ես ընկել, պիտի քաշես, ի՞նչ ասեմ: Դու էլ կլուսաբանես այդ վարչապետական պատարագները: Ինչքան գիտեմ՝ կառավարության շենք մտնելու պրոբլեմ չունես:
 

Էդիկ Անդրեասյան

«Հրապարակ օրաթերթ»