Վտանգավոր անհեթեթություն է Փաշինյանի առաջարկը, Եկեղեցին միշտ էլ բարձր է դասել ՀՀ խորհրդանիշները
Նիկոլ Փաշինյանի առաջարկությունն անհեթեթություն է, Եկեղեցում պատարագից առաջ ինչու՞ պիտի հնչի ՀՀ օրհներգը, ՀԱԵ-ն աշխարհի բոլոր հայերի եկեղեցին է, ոչ թե հենց միայն ՀՀ-ինը: 24News-ի հետ զրույցում նման կարծիք հայտնեց Սաղմոսավանքի հոգևոր հովիվ Տեր Փառեն քահանա Առաքելյանը:
«Մեր հայրերը մեզ սովորեցրել են՝ Եկեղեցին երկինք է երկրի վրա, եկեղեցում գովերգվում են միայն երկնային զորությունները կամ նրանք, որոնք կապված են երկնքի հետ, օրինակ՝ սրբերի մասին ենք երգում: Եկեղեցու ծեսը՝ տվյալ դեպքում պատարագը, գրվել է 40 ձեռագիր խորհրդատետրերի հիման վրա, անկախ մարդու պաշտոնից, ոչ մեկ չի կարող փոփոխություն մտցնել այդ ծեսում: Ամբողջ աստվածաբանական հիմքը մեկի առաջարկով չի կարող փոխվել»:
Տեր Փառենը նաև ընդգծեց, որ Եկեղեցին միշտ էլ ՀՀ օրհներգը և մյուս խորհրդանիշները բարձր է դասել ու դասում, եկեղեցական որևէ պաշտոնական արարողություն՝ լինի ժողով, թե ճեմարանի ավարտական հանդես, առանց ՀՀ օրհներգի հնչողության չի անցնում:
«Ասեմ ավելին՝ հանրապետական մաղթանքի ծես ունենք, այն աղոթք է ՀՀ-ի անսասանության համար, Վազգեն Վեհափառի ժամանակից ընդունված կարգ է, կատարվում է ՀՀ-ին վերաբերող տոներին: Անգամ պատարագի երկրորդ հատվածում աղոթք ունենք ՀՀ-ի համար, այնպես որ՝ արհեստական օրակարգ պետք չէ ստեղծել»:
Տեր Փառենը նշեց, որ իրականում Փաշինյանի առաջարկը վտանգավոր է, որովհետև թե՛ «այո»-ի, թե՛ «ոչ»-ի դեպքում խնդիր է առաջանալու:
«Եթե ասենք՝ այո, խնդիր է դառնում աշխարհի տարբեր ծայրերում գործող ՀԱԵ-ի համար, եթե ասենք՝ ոչ, կասեն՝ դեմ եք պետությանը: Պարզապես մեր Եկեղեցու շուրջ խոսակցությունը ուզում են թարմ պահել, իսկ մենք այդ դատարակ զրույցների մեջ չենք ուզում մտնել, ուզում ենք մեր հավատացյալները խաղաղ ապրեն, Հայրապետն իր տեղում պինդ մնա: Եկեղեցին ընդունում է պետությունը, հատուկ բարձր վերաբերմունք ունի պետության հանդեպ»:
Ինչ վերաբերում է Փաշինյանի տեսաուղերձում հնչած այն մտքին, թե պատարագի սկզբում «Խորհուրդ խորին» շարականում խոսվում է վերին պետության մասին՝ կարևորելով պետության դերը, Տեր Փառենը նշեց, որ նույն շարականը բացառապես Հիսուս Քրիստոսի մարմնի ու արյան մասին է, այնտեղ որևէ բառ կապված չէ քաղաքագիտական իմաստով պետության հետ:
«Էդպես յուրաքանչյուր տեքստից կարող ես բառ գտնել ու ասել՝ պետությանն է վերաբերում: Ամբողջ պատարագը Հիսուսի մասին է՝ «Վերջին ընթրիքի», պատարագ ի՞նչ է նշանակում՝ զոհաբերություն: Մի օր բոլորին հրավիրելու եմ Սուրբ Պատարագի մասին խոսելու, վերցնենք խորհրդատետրը և ամեն բառ քննարկենք»:
Հետևեք մեզ Viber-ում
