Բողոք Հերմինե Նաղդալյանի և Գագիկ Ջհանգիրյանի դեմ. նախկին քաղբանտարկյալը պառկել է ՄԻԵԴ-ի դիմաց

Ստրասբուրգում բնակվող, մարտի 1-ի գործով  նախկին քաղբանտարկյալ Գևորգ Մանուկյանը, երեկ,  աննախադեպ ակցիա է իրականացրել: Նա շուրջ մեկ ժամ պառկել է Մարդու իրավունքների եվրոպական դատարանի մոտ, ապա ակցիա է արել նաև Եվրոպական խորհրդի շենքի մոտ: «Լրացավ 8-ը տարին, երբ մարտի 1-ին 10 զոհ ու բազմաթիվ խեղված ճակատագրեր ունեցանք: Այս տարիների ընթացքում սայլը տեղից չշարժվեց: Դիմում եմ միջազգային մաշտաբով պատկան մարմիններին, ուզում եմ ասել, որ մարտի 1-ի գործը փակված չէ ու ես այս օտար երկրում փաստում եմ, որ  մեր երկիրը տաճար է, ուր սուրբ է ամեն քարը»,-Հայելի.am-ի թղթակցի հետ զրույցում ասաց Մանուկյանը, ում հոգին չի բուժվում արդեն ութը տարի, իսկ մեկ աչքը կուրացել է մարտի 1-ին: Նախկին քաղբանտարկյալը, ով մշտապես պայքարում է մարդու իրավունքների պաշտպանության համար նշում է, որ իր ակցիան հատկապես ԱԺ փոխնախագահ Հերմինե Նաղդալյանին էր ուղղված.«Վարդգես  Գասպարիի առնչությամբ` Հերմինե Նաղդալյանը ասել է, որ եթե նման բաները (դատարանում կամ այլ հասարակական վայրերում պառկած բողոք արտահայտել)Եվրոպայում արվեր, ապա չգիտեմ,  թե ինչ կանեին: Հիմա ես պառկել եմ Եվրոպայում ու ինձ ոչ մեկը չի ճնշում: Անգամ մոտենում էին ու խրախուսում»,-ընդծեց Գևորգ Մանուկյանը: Մանուկյանը տեղեկացրեց, որ իր հիմնական ակցիան «սամոզվանեց» քաղբանտարկյալ Գագիկ Ջհանգիրյանի դեմ է: «Ջհանգիրյանին ասում եմ, որ ինքը մարտի 1-ի քաղբանտարկյալ չէ: Նա բանտում եղել է, որովհետև դավաճանել էր իր թիմակիցներին»,-ասաց Մանուկյանը: Մանուկյանը նշում է, որ իր գործը Եվրոդատարան չի ուղարկվել ՀԱԿ-ի մեղքով: «Ես ավելի քան վստահ եմ, որ մարտի 1-ի հետ կապված միայն իմ գործը չէ, որ ՄԻԵԴ չի հասել: Ջհանգիրյանի գործը պետք է հասներ Եվրոդատարան»,-եզրափակեց Գևորգ Մանուկյանը: Աստղիկ Ավագյան