Նարեկ Սամսոնյանի կինը՝ ԵՄ դեսպանին. «Ձեր լռությամբ արդարացնում եք հետապնդումները». «Ժողովուրդ»

«Ժողովուրդ» օրաթերթը գրում է. «Քաղբանտարկյալ Նարեկ Սամսոնյանի կինը՝ Լուսինե Առաքելյանը, ուղերձ է հղել Հայաստանում ԵՄ դեսպան Վասիլիս Մարագոսին՝ պահանջելով ուշադրություն դարձնել Հայաստանում ընթացող, իր խոսքով՝ «հակաիրավական ու հակաժողովրդավարական գործընթացներին»։ Տեսաուղերձի սկավառակն ու տեքստը AntiFake.am-ը պատրաստվում է հանձնել ԵՄ գրասենյակին։

Առաքելյանը նշել է, որ ամուսինը արդեն երկրորդ անգամ է կալանավորվում իշխանություններին քննադատելու համար, իսկ վերջին ձերբակալությունն իրականացվել է ԱԱԾ հատուկ ստորաբաժանման կողմից՝ իրենց տան խուզարկությամբ, երեխաների ներկայությամբ։ Նա նաեւ ընդգծել է, որ իշխանությունների թիրախում է հայտնվել ոչ միայն Սամսոնյանը, այլեւ AntiFake.am հարթակը, որի ամբողջ տեխնիկան առգրավվել է։

Ուղերձում նա հայտարարել է, որ Սամսոնյանի կալանավորումը «բացառապես քաղաքական դրդապատճառներով» է՝ հիշեցնելով ԵԽԽՎ 1900 բանաձեւի այն չափանիշները, որոնց համաձայն, ըստ իրեն, ամուսինը համապատասխանում է «քաղբանտարկյալ» կարգավիճակին։ Նա նաեւ ընդգծել է, որ Հայաստանի բանտերում եւ վերահսկողության տակ, իր խոսքով, «վաթսունից ավելի քաղաքական հետապնդման ենթարկված անձինք» կան։

Առաքելյանը ԵՄ դեսպանին մեղադրել է լռության համար՝ նշելով, որ այդ լռությունը «օրվա իշխանություններին աջակցելու գործիք է դարձել»։ Նա պահանջել է դեսպանից արձագանք կամ անձնական հանդիպում՝ քննարկելու համար ստեղծված իրավիճակը։