Նոր խնդիրներ`ՆԱՏՕ-ի նավերի համար

Hurriyet Daily News թերթի փոխանցմամբ՝ Թուրքիային մտացածին է որակել տեղեկատվությունն այն մասին, թե ՆԱՏՕ-ի նավերին չի թույլատրել Էգեյան ծովում մուտք գործել երկրի ջրային տարածք։ Այդ մասին թերթին հայտնել է Թուրքիայի իշխանությունների ներկայացուցիչը, որը չի ցանկացել հրապարակել իր անունը. «Մենք անհրաժեշտ չենք համարում մեկնաբանել այն հաղորդումները, որոնք բխում են անանուն աղբյուրից և որոնք ակնհայտորեն կեղծիք են։ Նման հրապարակումների նպատակը սադրանքն է»։ Թուրքիայի ԱԳՆ-ի մամլո խոսնակ Թանժու Բիլգիչն իր հերթին հայտարարել է, որ Անկարան հանդիսացել է ՆԱՏՕ-ի նավերն Էգեյան ծով ուղարկելու նախաձեռնողը. «Դրա համար էլ անիմաստ է այն վարկածը, թե մենք դեմ ենք նրան»։ Մարտի 1-ին France Presse լրատվական գործակալությունը՝ վկայակոչելով Բրյուսելում իր դիվանագիտական աղբյուրներին, հայտնել էր, որ ՆԱՏՕ-ի նավերը չեն կարողանում կատարել իրենց առաջադրանքը, քանի որ Թուրքիան նրանց չի թույլատրում մուտք գործել իր ջրային տարածք։