«Պատիվ կզգամ, որ Էրդողանի եղբայրն եմ… պետք է հնազանդ լինել Թուրքիայի կառավարությանը». Արամ Աթեշյան

«Ես փոխանորդ եմ եւ թուղթ ունեմ կառավարության կողմից»,-Հայելի ակումբում հրավիրված ասուլիսում նման հայտարարություն արեց Պոլսո կարգալույծ արված պատրիարք Արամ արքեպիսկոպոս Աթեշյան՝խոսելով Պոլսո պատրիարքարանում ստեղծված իրավիճակի մասին: «Այս ութ տարվա մեջ ոչ ոք չգրեց իմ հաջողությունների մասին: Միայն ասում են՝ Աթեշյանը էրդողանի եղբայրն է: Պատիվ կզգամ դրա համար: Եթե ես երկրի նախագահի, վարչապետի հետ լավ եմ, իմ համայնքի  համար է, որ լավ եմ  նրանց հետ»,- անդրադառնալով իր հասցեին հնչած քննադատություններին ասաց Աթեշյանը: «Մի քանի եկեղեցիներ քանդված են եղել,  վերանորոգել  եմ տվել,  հայկական համայնքում երեխաների կրթության հարցն եմ լուծել: Ինձ  ընդառաջում են թուրքական իշխանությունները».ահա այն ամենը ինչ իր խոսքով արել է ստամբուլահայության համար:  «Բոլորը գնահատեցին, բայց որոշ հոգեւորականներ չգնահատեցին իմ աշխատանքը»,-հավելեց նա: Աթեշյանի խոսքով՝ այսօր ստամբուլահայ  համայնքը երեք թեւի է բաժանված՝ Գարեգին արքեպիսկոպոս Բեկչյանի,  Սահակ եպիսկոպոս Մաշալյանի, Աթեշյանի կողմնակիցներ: Ի վերջո, ե՞րբ կլինեն պատրիարքի նոր ընտրություններ, եւ կհանդարտվի  այս  իրավիճակը` Աթեշյանը դժվարացավ պատասխանել: «Պետք  է հնազանդ լինել պետությանը, այս դեպքում` Թուրքիայի կառավարությանը: Թուրքիայի իշխանությունն ասում է՝ չեք կարող առանց իմ համաձայնության փոխանորդ լինել:  Բեկչյանը պետք է հեռանա: Նոր ընտրություններ պետք է լինեն, եւ ընտրվի նոր պատրիարք»,- ասաց Աթեշյանը: Հարցին, թե ուզո՞ւմ է նորից պատրիարք լինել, Արամ Աթեշյանը հստակ չպատասխանեց: