Ղարիբաշվիլիի տունը բռնագրավել են

Վրաստանի նախկին վարչապետ Իրակլի Ղարիբաշվիլիի տունը բռնագրավվել է:

Փաստաբան Ամիրան Գիգուաշվիլիի խոսքով՝ այդ տունը կօգտագործվի Ղարիբաշվիլիի նկատմամբ դատավոր Էկա Բարբաքաձեի նշանակած գրավի դիմաց։

«Որպես փաստաբան ես միջնորդել եմ դատարանին՝ պարոն Իրակլիի նկատմամբ դատարանի սահմանած ապահովագրական միջոցը փոխարինել օրենքով նախատեսված անշարժ գույքով», — TV Pirveli-ին ասել է Գիգուաշվիլին։

Ղարիբաշվիլիի մեկ այլ փաստաբանի՝ Լիլի Գելաշվիլիի խոսքով, տան արժեքը մեկ միլիոն լարիից ավելի է, և որևէ այլ գրավի պահանջ այլևս չկա:

Իրակլի Ղարիբաշվիլիի նկատմամբ հոկտեմբերի 24-ին որպես խափանման միջոց կիրառվել է 1 մլն լարի գրավը: Դատախազությունը նրան մեղադրում է անօրինական եկամուտների օրինականացման համար` առանձնապես խոշոր չափի եկամուտ ստանալու զուգորդմամբ։