«Ինձ պետք չէ 1915 թվականի հարցը բացել». Արամ արքեպիսկոպոս Աթեշյան

«Եթե ես նախագահի, վարչապետի, նախարարի հետ լավ եմ՝ դա իմ համայնքի շահն է»,- այսօր «Հայելի» մամուլի ակումբում կայացած ասուլիսի ժամանակ ասաց Պոլսո պատրիարքական ընդհանուր փոխանորդ Արամ Աթեշյանը: Նա նշեց, որ ութ տարվա մեջ բազմաթիվ գործեր է կատարել ի նպաստ իր համայնքի, բայց դրա մասին ոչ մեկը չի խոսել և չի գրել: Սրբազան հայրը փաստեց, որ այսօր հայ համայնքը ոչ միայն պատրիարքի ընտրության պատճառով է պառակտված, այլ նաև ուրիշ խնդիրների, բայց դրա հետ թուրքական կառավարությունն ոչ մի առնչություն չունի. «Նախևառաջ սխալը մեր մեջ պետք է փնտրենք,-հավելեց նա և շարունակեց,- Իրավիճակի փոփոխությունը կախված է Գարե­գին  Բեկչյանից, եթե նա հրաժարվի տեղապահի պաշտոնից, ապա արքեպիսկոպոսի ընտրությունը կկայանա»:  Արամ Աթեշյանի կարծիքով՝ Գարեգին սրբազանը պետք է հեռանա, քանի որ պետությունը նրան չի ընդու­նում, ավելին՝ հայտարարեց, որ թուրքական պետությունը իրեն է ճանաչում որպես փոխանորդ և համայնքի գլուխ: Անդրադառնալով Էրդողանին գրած նամակին` Արամ Աթեշյանը ասաց, որ ինքը նամակում չի գրել ցեղասպանություն եղել է, թե ոչ: «Ես քայլում եմ այն ճանապարհով, որով քայլել են իմ նախորդները` ի շահ պոլսահայերի: Ինձ պետք չէ 1915 թվականի հարցը բացել»,- փաստեց նա և ասաց, որ ցեղասպանության հարցը միայն Հայաստանի և Թուրքիայի խնդիրն է, մյուս երկրներն այս փաստը հաճախ օգտագործում են իրենց շահերից ելնելով: Քրիստինե Աղաբեկյան