Սրտները աղմկոտ շոու էր ուզում, չստացվեց. «Հրապարակ»
«Հրապարակ օրաթերթը» գրում է. Կիրակի օրը Հ1-ը մեծ բանավեճ էր կազմակերպել Վաղարշապատ խոշորացված համայնքի ավագանու ընտրություններին մասնակցության հայտ ներկայացրած քաղաքական ուժերի առաջին համարների հետ։ Ընդդիմադիր «Մայր Հայաստան» կուսակցությունն ու «Հաղթանակ» դաշինքը հրաժարվել էին մասնակցել: Հիմնավորել էին, որ աղմկոտ շոուին մաս կազմելու ցանկություն չունեն։ Կանխատեսելով Պետրոս Ղազարյանի մանիպուլյատիվ «տրյուկներն» ու դրանից բխող հետեւանքները՝ «Հաղթանակ» դաշինքի համայնքապետի թեկնածու Սեւակ Խաչատրյանը հայտարարել էր, որ մերժում է հրավերը, քանի որ, բացի աղմկոտ շոուից, ուրիշ ոչինչ տեղի չի ունենալու։
Ընդդիմադիրների մերժումը մնացել էր իշխանական թեկնածուների կոկորդին։ Փոխանակ իրենց ծրագրային դրույթները ներկայացնելու եւ ընտրողին իրենց օգտին կողմնորոշելու, ՔՊ-ի թեկնածու Արգիշտի Մեխակյանն ու ընդդիմություն խաղացող, բայց իրականում ՔՊ-ի կցորդ «Հանրապետության» առաջին համար Հարություն Մկրտչյանը հաղորդման զգալի մասը նվիրեցին ընդդիմադիրներին՝ որոշելով, որ նրանք վախեցել են մասնակցել՝ ասելիք չունենալու պատճառով։
Կռիվ տալով ընդդիմադիր թեկնածուների ստվերի դեմ, թվում էր՝ իշխանականները պոռթկման տակ իրենց վախերն էին թաքցնում։ Վաղարշապատի ձախողված կառավարման մեղքը բարդելով Սեւակ Խաչատրյանի վրա՝ փորձում էին նրան մեղադրել, որ ավագանու ընդդիմադիր դաշտում լինելով, չի բռնել նախկին համայնքապետ Դիանա Գասպարյանի ձեռքը, երբ վերջինս, ընտանյոք հանդերձ, թաթախվել է կոռուպցիայի մեջ։
Զարմանալի չէր, որ Պետրոս Ղազարյանը համեստորեն լռում էր եւ Նիկոլ Փաշինյանի սրտի թեկնածուներին չէր հիշեցնում, որ երկրի կառավարումը 7 տարի իրենց ձեռքում է, եւ որ յուրաքանչյուր ձախողման ու կոռուպցիոն դրսեւորման պատասխանատուն հենց իրենք են, այլ ոչ թե ավագանու ընդդիմադիր խմբակցությունը։ Ավելին, նույնիսկ հարկ չհամարեց հիշեցնել, որ Դիանա Գասպարյանը համայնքապետ էր ընտրվել ՔՊ-ի ցուցակով եւ հնարավոր է՝ մինչեւ այսօր էլ վայելում է կուսակցության հովանավորությունը։ Հակառակ դեպքում կալանավայրում կլիներ՝ Գյումրու համայնքապետի կողքին, եւ քրեական վարույթն էլ անվերջ չէր ձգվի։
Բանավեճը ժամանակ առ ժամանակ սրելու փորձ էր անում «Հանրապետություն» կուսակցության թեկնածուն, որի համար Պետրոս Ղազարյանի տաղավարը հարազատ վայր է դարձել՝ այնքան հաճախ են նրանց հրավիրում։ Տպավորություն էր, որ Հարություն Մկրտչյանը բանավեճին ներկա էր միայն վեճ ու աղմուկ հրահրելու նպատակով։ Հասկանալով նրա մտայնությունը, ընդդիմադիր դաշտում դիրքավորված մյուս թեկնածուները, որոնք մասնակցում էին բանավեճին, բավականին զուսպ ու շրջահայաց գտնվեցին՝ թույլ չտալով նրան հաղորդումը տանել նախապես որոշված սցենարով։
Հետևեք մեզ Viber-ում
