Գերի չենք, սենց չի լինի, պարոն Բաբլոյան ջան

ԱԺ արտահերթ նիստի մեկնարկին «Ելք» խմբակցության պատգամավոր  Արտակ Զեյնալյանը բողոքեց և ընդգծեց, որ շատ կարճ ժամանակ է տրվում կարևորագույն օրենքների քննարկման համար, ինչը կառավարության սխալ աշխատանքի արդյունքն է: Էդմոն Մարուքյանն էլ նկատեց. «Տանել նման օրենքները նման քննարկման սխալ է: Ազգային ժողովը կառավարության գերին չէ, մենք չե՞նք կարողանում ասել, որ օրենքները 1 ամիս շուտ ուղարկեն, սենց չի լինի, պարոն Բաբլոյան ջան»։ ԱԺ փոխնախագահ Էդուարդ Շարմազանովը հորդորեց շարունակել աշխատանքաները։ «Քվեարկությունն ավարտել ենք արդեն, ըստ դրանց էլ պետք է աշխատել։ Յուրաքանչյուր պատգամավոր իր կարծիքն արտահայտում է քվեարկությամբ, ավելորդ կրքերի բորբոքումը շահեկան չէ հենց մեր իսկ աշխատանքների համար, 4 հոգի է ընդամենը դեմ քվեարկել», - նշեց նա։ ԱԺ նախագահ Արա Բաբլոյանն ասաց, որ օրակարգից դուրս կգան «ՀՀ քրեական դատավարության օրենսգրքում փոփոխություններ և լրացումներ կատարելու մասին», «Հայաստանի Հանրապետության վարչական դատավարության օրենսգրքում փոփոխություններ և լրացում կատարելու մասին», «Հայաստանի Հանրապետության քրեական օրենսգրքում փոփոխություն կատարելու մասին», «Բնակչության բժշկական օգնության և սպասարկման մասին» Հայաստանի Հանրապետության օրենքում փոփոխություն կատարելու մասին նախագծերը: