Շանտաժ են անում

Երիտասարդներ խումբը փորձում է շանտաժի միջոցով ինչ-որ բանի հասնել:  Խորհրդարանում լրագրողների հետ զրույցում ասաց պաշտպանության նախարարի առաջին տեղակալ Արտակ Զաքարյանը` անդրադառնալով «Հանուն գիտության զարգացման» նախաձեռնության այն հայտարարությանը, թե իրենց բանակցություններն իշխանության հետ ավարտված են, և իրենք սկսում են հացադուլ: «Մենք հստակ բացատրել ենք, որ տարկետման իրավունքը չի վերանում, այն կա և նույնիսկ ավելի ընդլայնվում է «Պատիվ ունեմ» ծրագրով: Անկախ նրանից երիտասարդները դասադուլ են անում, թե բողոքում են, մենք ամեն ինչ անելու ենք, որ գիտության մեջ աչքի ընկած երիտասարդները ծառայեն՝ գիտությանը մոտ լինելով: Կներեք, բայց ստացվում է, որ գործ ունենք երիտասարդների խմբի հետ, որոնք շանտաժի միջոցով ուզում են ինչ-որ բանի հասնել. դա արդար չէ, ճիշտ չէ», - նշեց նա: Ինչպես ասաց՝ եղել է  հստակ պայմանավորվածություն: Երիտասարդներին տրվել է հնարավորություն ներկայացնելու առաջարկություններ, որին մենք սպասում ենք: Տարօրինակ է, որ երիտասարդները չեն ցանկանում հետևել հնարավորությանը, ինչի համար երկար պայքարել են: «Երկու առաջարկություն է ներկայացվել նրանց կողմից, որից մեկը հնարավոր չէր ընդունել, որովհետև դա  կխաթարեր  բանակն ու կրթությունը, և իրենց էլ այնքան բնական ու առողջ ձևով էր բացատրվել դրա անհնարինությունը, որ նրանք էլ էին հասկացել: Ես ինքս մի քանի օր առաջ կապվել եմ երիտասարդներից մեկի հետ ու խնդրել եմ, որ այս շաբաթվա ընթացքում ներկայացնեն առաջարկներ, որի համաձայն՝ կառավարության որոշմամբ հնարավոր կլինի հստակ սահմանել գիտության և կրթության ոլորտում նշանակալի ձեռքբերումեր և ընդգծված կարողություններ ունեցած անձանց տարկետման կարողություններ տալը: Ինձ համար տարօրինակ է, որ այդ հնարավորությունը, որի համար ուսանողները պայքարում էին, չեն պատրաստվում օգտագործել», - նշեց նա: