Դելֆինը ձուկ չէ, սարդը միջատ չէ, իսկ հավը ձուն ածում է առանց աքլորի. ՀՀԿ-ականները պնդում են

ՀՀ Ազգային ժողովի «ԵԼՔ» և «Ծառուկյան» խմբակցությունների առաջարկով Առողջապահության և սոցիալական հարցերի մշտական հանձնաժողովում «ՀՀ-ում մարդու պապիլոմա վիրուսի դեմ պատվաստումների վերաբերյալ» թեմայով քննարկմանը ԱԺ Հանրապետական խմբակցության պատգամավոր Արման Սաղաթելյանը նշեց, որ պապիլոմա վիրուսի դեմ չպատվաստվելը պոպուլյացիոն վտանգի է ենթարկվում: «Խնդիրն այն է, որ դեռահասների միջավայրում որոշումը` արդյոք իրենց պատվաստում են, թե՞ ոչ, կայացնում են մեծերը, մեծերի հետ աշխատելը չափազանց անշնորհակալ գործ է: Ես` որպես ձեր դաշնակից, մեկ ամիս է՝ զբաղված եմ մասսայականացնելով, թե ինչ բան է հակամարմինը, ինչով է վիրուսը բացիլից տարբերվում, պատվաստանյութն ինչ է… Ահավոր վիճակ է: Ես ուսումնասիրել եմ գրքերն ու ծրագրերը և բացահայտել հետաքրքիր մի բան. Եթե ընդհանուր կենսաբանության ուսումնական ծրագրում մենք նույն ծավալն ենք հատկացնում ձկներին ու վիրուսներին, ես խնդիր եմ տեսնում այստեղ: Այսինքն` եթե հասուն մարդկանց զգալի մասը մինչ օրս չգիտի, որ դելֆինը ձուկ չէ, սարդը միջատ չէ, իսկ հավը ձուն ածում է առանց աքլորի, դա խնդիր չէ, բայց եթե պատվաստման վերաբերյալ ընդամենը երկու պարբերություն է գրված, այն էլ՝ ընդհանուր բնույթի տեքստեր, ես կարծում եմ՝ միջգերատեսչական կապը պետք է այստեղ աշխատի»,- ասաց նա։ «Ծառուկյան» խմբակցության պատգամավոր Նաիրա Զոհրաբյանը հետաքրքրվեց`  ինչո՞ւ են ԱՄՆ–ը և Գերմանիան հրաժարվել  պապիլոմա վիրուսի դեմ պատվաստվելու ծրագրից: Սաղաթելյանը պատասխանեց, որ նման բան չկա, այդ երկրներում ևս պատվաստումներ իրականացվում են: