Պապիլոմա վիրուսի դեմ տղաներին ևս կպատվաստեն

ՀՀ Ազգային ժողովի «ԵԼՔ» և «Ծառուկյան» խմբակցությունների առաջարկով Առողջապահության և սոցիալական հարցերի մշտական հանձնաժողովում «ՀՀ-ում մարդու պապիլոմա վիրուսի դեմ պատվաստումների վերաբերյալ» թեմայով քննարկմանը «Ելք» խմբակցության ղեկավար Նիկոլ Փաշինյանը հայտարարեց, որ տեղեկություններ ունի, որ պապիլոմա վիրուսը նույնքան վտանգավոր է նաև տղաների մոտ: Առողջապահության նախարարության Վ. Ա. Ֆանարջյանի անվան ուռուցքաբանության ազգային կենտրոնի դիսպանսերային և պոլիկլինիկական գծով փոխտնօրեն և ուռուցքաբանության բաժանմունքի վարիչ Գագիկ Բազիկյանի խոսքով՝ շատ եվրոպական երկներ տղաներին էլ են սկսել պատվաստել, և հնարավոր է Հայստանում ևս պատվաստեն: Տղաները ունեն ուղղակի փոխանցող օղակի դերակատարություն, և 11 երկրում պատվաստումը կատարում են նաև տղաներին, որպեսզի չփոխանցվի: «Ապացուցված է, որ արգանդի վզիկի քաղցկեղը երբ հայտնաբերում ենք, 99-98% դեպքերում հայտնաբերում ենք պապիլոմա վիրուսը, գիտենք, որ քաղցկեղն ունի բազմաթիվ զարգացման թեորիաներ: Եթե մենք գիտենք արգանդի վզիկը կոնկրետ այս վիրուսով է առաջանում, այլ ուռուցքների ժամանակ դա ապացուցված չէ, այդ իսկ պատճառով էլ միայն արգանդի վզիկի քաղցկեղի ժամանակ է լինում այդ վիրուսի ներկայությունը»,-ասաց նա: