Թող մի հրացան առնեն, գան բոլորիս սպանեն. լարված իրավիճակ քաղաքապետարանի մոտ /տեսանյութ/

Երեկ Երևանի քաղաքապետարանի դիմաց հավաքվել էին Պուշկինի փողոցի նախկին մի քանի տասնյակ բնակիչներ, որոնց տները 12 տարի առաջ բացառիկ գերակա հանրային շահ են ճանաչվել եւ քանդվել, սակայն բնակիչները համապատասխան փոխհատուցումը չեն ստացել: «Մենք մեր բնակարններն ենք պահանջում: Թող մեր տները հետ տան, էս պետությունը մեզ թալանեց, հիմարի տեղ դրեցին, բռնի ուժով պայմանագիր կնքել տվեցին»,-ասաց բնակիչներից տիկին Գոհարը: Ոստիկանների հորդորները՝ դադարեցնել վանկարկումները, քաղաքացիներին ավելի նյարդայնացրին. «Պարապ մարդիկ չենք, որ եկել ենք էստեղ կանգնել ենք, 13 տարին քիչ չի, չէ՞: Թող իրենց երեխեքն էլ մեր օրն ընկնեն»,-ասում էին բողոքող քաղաքացիները: Ի վերջո նրանց  մոտեցավ քաղաքապետարանի ներկայացուցիչը՝ հորդորելով ընդունարան գնալ եւ քննարկել հարցը: Քաղաքացիները, սակայն, հրաժարվեցին: «Մենք վա՞տ ենք եղել: Միշտ եկել եք, ինչ-որ համաձայնության ենք եկել, հիմա էլ ասում եմ եկեք ներս՝ զեկուցեմ քաղաքապետին, տեսնենք ով է ձեզ ընդունում»,- առաջարկեց պաշտոնյան: Ցուցարարներին սա չգոհացրեց: «Դուք ավելի լավ է մի՛ խառնվեք, մենք ձեզ հարգում ենք, բայց չենք գա: Ավելի լավ է՝ ասեք մի հրացան առնեն, գան բոլորիս սպանեն, մենք էլ պրծնենք, դուք էլ»,- նշեց բնակիչներից մեկը: Բնակիչներից մեկն էլ ընդգծեց, որ իրենք մարտի 1-ը հատուկ են ընտրել.«Մեր գլխն էլ էս տեսակ մարտի 1 են բերել»: Նշենք, որ բնակիչները պարզել էին  «Էդիկ Թախունց, խարդախ տնաքանդ պաշտոնյա», «Զախարյանը Հյուսիսային պողոտայի բնակիչներին խաբեց-քցեց փողոց», «Դատարանը՝ կաշառատու»  գրություններով պաստառներ: Աստղիկ Ավագյան Մանրամասները՝ տեսանյութում: