26-ամյա վարորդը «Toyota»-ով ճանապարհի մերկասառույցի պատճառով 35 մետր գլորվելով, գլխիվայր հայտնվել է ձորում (լուսանկարներ)

Այսօր, դեկտեմբերի 17-ին, խոշոր ավտովթար է տեղի ունեցել Կոտայքի մարզում: Ժամը 13:40-ի սահմաններում Պտղնի գյուղի բնակիչ, 26-ամյա Էդվարդ Նազարյանը՝ Երևան-Սևան ավտոճանապարհից դեպի Ներքին Պտղնի գյուղ տանող ավտոճանապարհի 1-ին կմ հատվածում իր վարած «Toyota» մակնիշի 35 DС 206 համարանիշի ավտոմեքենայով դուրս է եկել ճանապարհի հանդիպակած երթևեկելի գոտի, բախվել բետոնե արգելապատնեշին և մոտ 35 մետր մի քանի պտույտ շրջվելով, գլխիվայր հայտնվել է ձորում: Shamshyan.com-ի հաղորդմամբ, վթարի հետևանքով վարորդ Է. Նազարյանը, նրա ուղևորներ՝ համագյուղացի, 34-ամյա Արման Նազարյանը, և Երևան քաղաքի բնակիչ, 58-ամյա Մայրանուշ Նազարյանը, մարմնական վնասվածքներով տեղափոխվել են Աբովյանի բժշկական կենտրոն, որտեղից էլ՝ Երևանի թիվ 1 համալսարանական հիվանդանոց: Վիրավորներին ձորից դուրս են բերել փրկարարները, Աբովյանի բժշկական կենտրոնի բժիշկները, և քաղաքացիները: Դեպքի վայրում հավաքվածներն ասում էին, որ վիրավորներից մեկին հիվանդանոց է ուղեկցել վաշտի հրամանատար Ա. Պետրոսյանը:Փաստի առթիվ ՃՈ 2-րդ սպայական գումարտակի 3-րդ վաշտի հետաքննիչ Ավետիք Ավետիսյանի կողմից նյութեր են նախապատրաստվում: Վթարի պատճառներից մեկը նաև այն է, որ Պտղնիի գյուղապետարանը չի բարեհաճել կատարել ճանապարհը մերկասառույցից մաքրելու աշխատանքներ, ինչն էլ եղել է խոշոր վթարի պատճառ: Իսկ եթե մեծն գյուղապետը բարեհաճեր գոնե մի քանի բահ աղ ու ավազ լցնել ճանապարհին, ապա վթարը տեղի չէր ունենա: