Փաշինյանի կոչին միացած Տեր Արամը խոչընդոտել է նորանշանակ հոգեւորականի մուտքը եկեղեցի. մանրամասներ

Վաղ առավոտից մինչեւ 16։00-ն Արագածոտնի մարզի Օհանավան գյուղի Հովհաննավանք եկեղեցում ոչ մի հոգեւորական չի ներկայացել ծառայության։ Այս մասին NEWS.am-ի հետ զրույցում հայտնեցին եկեղեցու հարեւանությամբ բնակվող գյուղացիները։

«Երեկ ոստիկանությունը լսվել էր այստեղ, այդ թվում եւ եկեղեցու բակ։ Չգիտենք, թե կոնկրետ ինչն է պատճառը, բայց ինչքանով հասկացանք Հովհաննավանքում նոր հոգեւոր հովիվ է նշանակվել ծառայության եւ Տեր Արամը՝ նախկին հոգեւոր հովիվը, բնակիչների հետ փորձել է խոչընդոտել Տեր Մանուկ Զեյնալյանի մուտքը, ինչպես նաեւ ոստիկանների է հրավիրել»,– ասացին Օհանավանի բնակիչները։

Նշենք, որ այսօր 16։00-ին Հովհաննավանքում մկրտության արարողություն էր նշանակված, որը սկսվեց մի փոքր ուշացումով պատճառն, ըստ լուրերի, այն է, որ երեկվա միջադեպով պայմանավորված Տեր Արամը հրավիրվել էր քննչական կոմիտե։
NEWS.am-ը պարզաբանում ստանալու նպատակով կապ հաստատեց Քննչական կոմիտե, որտեղից դեռ պատասխան չենք ստացել։