Վրեժ կուսակցությունից

Ընտանեկան բռնության մասին բազմաչարչար օրենքը  թեժ քննարկումներից հետո ընդունվեց Ազգային ժողովում: Հայու գենի ու ավանդական արժեքների ջատագովները, որոնք օրենքը մարտահրավեր էին ընդունել որպես այդ գենի բնաջնջման, հայկական ավանդական ընտանիքի քայքայման հարցում, կարողացան հասնել նրան, որ նախնական նախագիծը արմատապես փոփոխության ենթարկվի, կլորացվեն սուր անկյունները, կռտվեն ոչ հայեցի դրույթներն ու այլն: Փոխվեց անգամ վերնագիրը եւ դարձավ ավելի խաղաղասիրական՝ «Ընտանիքում բռնության կանխարգելման, ընտանիքում բռնության ենթարկված անձանց պաշտպանության եւ ընտանիքում համերաշխության վերականգնման մասին»։ Բայց  միեւնույն է, այս երկար ու ձիգ ոդիսականն էլ չհամոզեց ԱԺ որոշ պատգամավորներին, որոնք սկզբից մինչեւ վերջ ոտքերը  «գազին» դրած դատափետեցին օրինագիծը։ Հիշեցնենք, որ օրենքի նախագծին դեմ արտահայտվողների մի ստվար հատված էլ ՀՀԿ-ում կար, որոնց առաջամարտիկը ՍԻՄ կուսակցության նախագահ Հայկ Բաբուխանյանն էր: Եթե վերջինս մինչեւ վերջ մնաց իր կարծիքին ու երկրորդ ընթերցման ժամանակ , ինչպես առաջինի, չմասնակցեց քվեարկությանը, քանի որ բաբուխանյանները ՀՀԿ-ին դեմ որեւէ գործողություն չեն անում, ապա շատերը նախագծի փոփոխությունից հետո  փոխեցին նաեւ իրենց դիրքորոշումը: Եւ այս համատեքստում ուղղակի անհավանական բան տեղի ունեցավ, ընդդիմադիր որոշ պատգամավորների պես  դեմ քվեարկեց ՀՀԿ-ական Հակոբ Հակոբյանը, որի անվան շուրջ վերջին շրջանում աղմուկը չի նվազում կապված պատգամավորի աղմկահարույց հայտարարության հետ: Զարմանալի է, որովհետեւ Հակոբյանը կողմ էր քվեարկել առաջին ընթերցման ժամանակ, իսկ առաջինից երկրորդ ընթերում կարծես թե արմատական փոփոխություններ չեն կատարվել, ընդամենը ընթացակարգային քննարկման է նախագիծը ենթարկվել:  Ի դեպ, առաջին ընթերցման ժամանակ քվեարկությանը ՀՀԿ-ից չէին մասնակցել Միհրան Հակոբյանը, Հայկ Բաբուխանյանը, Շուշան Պետրոսյանը: Հակոբ Հակոբյանը քննարկումների ընթացքում առանձնապես աչքի չի ընկել իր ավանդական տեսակետներով ու հայու գենի պահպանմանմասին բոցաշունչ ելույթներով, ինչը  չես ասի Հայկ Բաբուխանյանի մասին: Եւ ուրեմն միթե պարոն Հակոբյանը հոգու խորքում հենց այդպիսին է եղել ու ՀՀԿ-ի միակ ավանդապաշտը, հայ ընտանիքի նվիրյալը վերջապես պոռթկաց ճիշտ ժամանակին: Բայց միգուցե Հակոբ Հակոբյանն ընդամենը իր նեղացածությունն այսկերպ հայտնեց հարազատ կուսակցության նկատմամբ, վրեժ լուծեց կուսակցությունից, որ իր համար օրհասական պահին նեցուկ կանգնելու փոխարեն մի բան էլ շիկացրեց հանրային կրքերը, հաստատեց իր մեղքը: Հիշենք Էդուարդ Շարմազանովի հայտարարությունը, որն ասել էր թե պատրաստ է ներողություն խնդրել Հակոբյանի փոխարեն, ով հարվածի տակ հայտնվել էր թանկացումների մասին այս հայտարարության պատճառով «աղքատը քիչ է ծախսում, ու նրա մոտ սովորություն կա ինքնաբուխ խուսափել թանկացած ապրանքներից՝ ինքնապաշտպանության ինստինկտով»: Նրան մանդատից զրկելու գործընթաց է սկսվել, իսկ ՀՀԿ-ն կրկին մատը մատին չի խփում: Մնում է սպասել,թե  երբ Արփինե Հովհաննիսյանը կվերադառնա գործուղումից ու որտեղ կտանի Հակոբ Հակոբյանին նրան բացատրելու, որը որից հետո է: Շաբաթներ առաջ նա Ռուստամ Մախմուդյանին, որը հանդգնեց հրապարակային կարծիք հայտնել, որը լիովին չէր համապատասխանում ՀՀԿ-ի տարած գծին, տիկինը հրապարակային սաստեց նորաթուխ պատգամավորին ու ասաց, որ այդ ամենը կքննարկեն կուսակցական հարթակում: Անի Սահակյան