«Բանաձև». Սերժ Սարգսյանը՝ իր ապագայի մասին (հարցազրույցն ամբողջական)

Սերժ Սարգսյանը ռացիոնալ չի համարում ԵՏՄ-ից դուրս գալու պահանջը։ «Արմենիա» հեռուստաընկերությանը տված բացառիկ հարցազրույցում Սարգսյանը  հայտարարել է. «Բացարձակապես ռացիոնալ պահանջ չէ, որոշակի շահերին ծառայելու ցանկություն եմ տեսնում, կամ որոշակի համոզվածություն, որը գալիս է նյութին մինչև վերջ չտիրապետելուց։ Որևէ լուրջ փաստարկ չեմ լսել ԵՏՄ-ից դուրս գալու վերաբերյալ»։ Անդրադառնալով վերջին շրջանում ակտիվացած ղարաբաղյան բանակցային գործընթացին՝ Սերժ Սարգսյանը, մասնավորապես, նշել է.  «Իմ տեսլականը կարգավորման շուրջ․ շփման գծում պետք է հանդարտություն տիրի, զոհերը պետք է բացառվեն, դա կստեղծի որոշակի մթնոլորտ, փոխվստահություն, փոխվստահություն ձեռք բերվում է միայն նախօրոք ձեռք բերված պայմանավորվածությունները կատարելիս»։ Վերահաստատելով ապրիլյան պատերազմից հետո հայկական կողմի բազմիցս հնչեցրած դիրքորոշումը՝ Սարգսյանը նշել է  «Պետք է լարվածությունը թուլացնել, մեխանիզմներ ստեղծել, հետո խորանալ փաստաթղթի շուրջ։ Հնարավոր չէ մի ձեռքով բանակցել, մյուսով կրակել։ Այդպիսի պայմաններում հնարավոր չէ գալ համաձայնության։ Կրակոցները միշտ խանգարում են, մարդկային զոհերը միշտ շատ ցավալի են։ Հանդարտ մթնոլորտում պետք է կշռադատել յուրաքանչուր բառը»։ Ինչ վերաբերում է շրջանառվող լուրերին, թե նոյեմբերին Ռուսաստանի արտգործնախարար Սերգեյ Լավրովի՝ Բաքու և Երևան կատարած այցի ժամանակ ներկայացվել են կարգավորման նոր առաջարկներ՝ այսպես կոչված «Լավրովի պլանը», Սերժ Սարգսյանը հայտարարել է. «Երևան այցի ժամանակ որևէ հայեցակարգային առաջարկություն չկար Լավրովի կողմից, հայ-ռուսական հարաբերությունների օրակարգը այնքան հարուստ է, որ բարձրաստիճան պաշտոնյաների այցերի ժամանակ միայն ղարաբաղի հարցը չենք քննարկում»։ Խոսելով հաջորդ տարվա ապրիլից իշխանության վերաձեւումների մասին Սարգսյանն ասել է. «Իշխանության գծապատկերը Սահմանադրությունն է սահմանել։ Եթե նկատի ունեք կոնկրետ պաշտոնատար անձանց, ապա բնական է, որ ես իմ գործընկերները մշտապես փնտրտուքի մեջ ենք»,- նշել է նախագահը եւ հավելել. «Սահմանված ժամկետներում կզբաղեցվեն բոլոր պաշտոնները։ Կարող եք չկասկածել։ Երբ խոսում են այս կամ այն պաշտոնում սա կամ նա է լինելու, երեւի լավ է, որ խոսում են։ Մարդիկ իրավունք ունեն ակնկալելու ինչ-որ բաներ։ Բայց որեւէ իշխանություն նախօրոք նման բաներ չեն ասում։ Պետական պաշտոններում նշանակելու հարցը նախօրոք ասելը սխալ է»։ Դիտարկմանը, թե «դատելով Ձեր ծրագրերից՝ դուք նման չեք պաշտոնյայի, որը եզրափակում է իր կարիերան», Սերժ Սարգսյանը պատասխանել է. «Բոլոր դեպքերում ճիշտ ճանապարհը սա է, պետք է մինչեւ վերջին պահը բարեխիղճ կատարել այն պարտականությունները, որ դու կամովին ես ստանձնել։ Ես պատրաստ պիտի լինեմ մինչեւ վերջին վայրկյանը կատարել իմ պարտականությունները Դրանից հետո կտեսնենք՝ ինչ կլինի»։ Հարցին, թե կշարունակի մնալ քաղաքականության մեջ, Սարգսյանը պատասխանել է. «Կտեսնենք»։