Փարաքարի սպանությունը միջանձնային հարցերի հետ է կապված, փետրվարյան դեպքերի շարունակությունն է

Փարաքարի համայնքապետի սպանությունը միջանձնային հարաբերությունների հետ է կապված, փետրվարյան դեպքերի շարունակությունն է։ Այս մասին 24News-ին հայտնել է փոխոստիկանապետ Վարդան Վարդանյանը։

«Մերձավանում կատարված սպանության դեպքով ձերբակալված անձ կա, առաջիկայում հանդես կգանք պաշտոնական հաղորդագրությամբ։ Բազմաթիվ օպերատիվ-հետախուզական միջոցառումներ ենք իրականացրել։ Դեպքը կապված է միջանձնային հարաբերությունների հետ, փետրվարյան դեպքերի շարունակությունն է»,- ասել է նա։

Վարդանյանի խոսքով, քաղաքական որևէ էլեմենտ չկա այս դեպքի շրջանակներում։

Նշենք, որ սպանության վարկածներից մեկը հնարավոր վենդետան է՝ կապված ամիսներ առաջ Մերձավանի համայնքապետ Մհեր Ախտոյանի մասնակցությամբ վիճաբանության ժամանակ նրա հորաքրոջ որդու՝ 29-ամյա Գրիգոր Օհանյանի սպանության հետ։

Հիշեցնենք, որ սեպտեմբերի 23-ին՝ ժամը 23.52-ին, ՆԳՆ ոստիկանություն ահազանգ է ստացվել, որ Արմավիրի մարզի Մերձավան բնակավայրի Երևանյան խճուղում կրակոցներ են հնչել։ Սպանվել է Փարաքար համայնքի ղեկավար Վոլոդյա Գրիգորյանը, նրա ընկերը՝ Արարատի քրեական ոստիկանության աշխատակից Կարեն Աբրահամյանը։ Կրակոցների պահին նրանց հետ նույն վայրում գտնված Արծրուն Գալստյանը վիրավորվել էր։

Հայտնի է, որ դիմակավորված անձը մոտեցել է կանգնած 3 անձանց, կրակահերթ է արձակել, այնուհետև հեռացել է դեպքի վայրից։