Մի վերջին շանս՝ Ադրբեջանին

Մարդու իրավունքների եվրոպական դատարանը հատուկ գործընթաց է սկսել ընդդեմ Ադրբեջանի՝ կապված այդ երկրի կողմից ընդդիմադիր գործիչ Իլգար Մամեդովի գործով եվրոպական դատարանի կայացրած վճիռը կյանքի չկոչելու փաստի հետ: Գործընթացը 2010 թվականին ներառվել է Մարդու իրավունքների եվրոպական կոնվենցիայի մեջ: Այն լիազորություն է տալիս Եվրոպայի խորհրդի նախարարների կոմիտեին դիմելու ՄԻԵԴ՝ անդամ-պետության կողմից ստրասբուրգյան դատարանի որոշումը չկատարելու հարցով: ԵԽ նախարարների կոմիտեն դեկտեմբերի 5-ին հարուցել է նախադեպը չունեցող դատական քննություն Ադրբեջանի կողմից Մարդու իրավունքների եվրոպական դատարանի (ՄԻԵԴ) կայացրած վճիռը չկատարելու վերաբերյալ: ՄԻԵԴ-ը կոմիտեից պաշտոնական դիմումը ստացել էր դեկտեմբերի 11-ին: Կոմիտեն հիշեցրել էր, որ համաձայն կոնվենցիայի 46-րդ հոդվածի՝ պատասխանող կողմ հանդիսացող պետությունը պետք է ենթարկվի այն դատական գործերի բոլոր որոշումներին, որոնց տվյալ երկիրը ներգրավված է որպես կողմ: Համաձայն այդ պարտավորության՝ տվյալ երկիրը պետք է ձեռնարկի բոլոր անհրաժեշտ քայլերը արձանագրված խախտումները վերացնելու նպատակով: Որպես անհրաժեշտ քայլ Ադրբեջանը պարտավորվել էր ազատ արձակել Մամեդովին, ով, սակայն, շարունակում է մնալ անազատության մեջ: Նախարարների կոմիտեն արձանագրել է, որ Մամեդովին անհապաղ ազատ չարձակելով Ադրբեջանը հրաժարվել է ենթարկվել ՄԻԵԴ վերջնական որոշմանը: Մամեդովը մինչ օրս գտնվում է բանտում: