Սերժ Սարգսյանի ծանր բեռը թե՛ հաջողելու, թե՛ ձախողելու դեպքում
Հայաստանում Ֆրանսիայի նորանշանակ դեսպան Ժոնաթան Լաքոտը ի պատասխան հարցին, թե արդյոք Ռուսաստանի նախաձեռնած ԵԱՏՄ անդամ Հայաստանը վերջերս Եվրամիության հետ համաձայնագիրը ստորագրելուց հետո կկարողանա իրականություն դարձնել ստանձնած պարտավորությունները և չի ընկի ռուսական ազդեցության տակ, նշել է․ «Հայաստանի տնտեսությունն այն կարկանդակ է, որը ոչ թե բոլորն ուզում են կիսել, այլ մեծացնել»: «Ռուսաստանը ներկա է Հայաստանի ընդհանուր համայնապատկերում, դա ակնհայտ է, բոլորը գիտեն: Բայց մենք էլ, և ոչ միայն մենք, նաև եվրոպական այլ երկրները, նույնպես ուզում ենք մեր բաժին մասնակցությունը տեսնել Հայաստանի տնտեսական այս համատեքստում», - հավելել է նորանշանակ դեսպանը: Անշուշտ, նոյեմբերի 24-ին Բրյուսելում Հայաստանի և Եվրամիության միջև կնքված համաձայնագիրը պատմական իրադարձություն էր, ավելին՝ դրան մենք դժվարին ճանապարհով հասանք՝ մի փուլում, երբ Ռուսաստան-Արևմուտք հարաբերությունները դինամիկ անցնում էին սրման տարբեր փուլերով: ՀՀ-ԵՄ համաձայնագիրը իր ձևի մեջ իսկապես եզակի է, որովհետև այս պահի դրությամբ այն միակ փաստաթուղթն է, որ ստորագրվել է Եվրասիական տնտեսական միության անդամ պետության հետ: Սա կարևոր հանգամանք է թե՛ համաձայնագիրը հաջողելու, թե՛ տապալելու առումով: Հայաստանը մեծ պատասխանատվություն է վերցրել իր ուսերին: Եթե հաջողենք՝ մենք դառնալու ենք օրինակելի ԵԱՏՄ-ական պետություն, որը կարողացել է չնայած Ռուսաստանի ազդեցությանը՝ հասնել ձեռքբերումների: Քիչ անց հստակ է դառնալու, թե Հայաստանի իշխանությունները ինչպես են առաջ տանելու ԵՄ-ի հետ ստորագրված համաձայնագրով նախատեսված պարտավորությունները: Հայաստանի համար մեծ պատասխանատվություն է, որովհետև համաձայնագիրը ենթադրում է, որ Հայաստանը բարեփոխումներ է նախաձեռնելու և իրագործելու, ընդ որում՝ ԵՄ հսկողության ներքո: Այսինքն, պատրանքները չեն ներվելու մեզ. կամ առաջ ենք ընթանում, կամ՝ տեղում ենք դոփում: Բացի այդ, բացի ներքի բարեփոխումները՝ Հայաստանը հաջողելու դեպքում ՀՀ-ԵՄ համաձայնագրի շնորհիվ չափազանց կարևոր օղակ կարող է դառնալ տարածաշրջանում: Մեր իշխանությունները հաճախ են սիրում խոսել՝ ԵԱՏՄ շուկայի հասանելիության, ԵՄ-ԵԱՏՄ կամրջի մասին, Իրան-ԵԱՏՄ հնարավորությունների մասին: Ահա, պատեհ առիթ է, որ գործնականում, երկրի ներսում իրականացրած բարեփոխումների արդյունքում Հայաստանը դառնա տնտեսական առումով թափանցիկ երկիր՝ ձեռքբերելով տարածաշրջանային նշանակություն: Ի՞նչ է անհրաժեշտ դրա համար: Գործարար աշխարհի համար ապահով միջավայրի ստեղծում, ազատ տնտեսական հարաբերություններ, իրական մրցակցություն, կոռուպցիայի բացառում: Ի դեպ, եվրոպացի դեսպաններն արդեն իսկ հայտարարում են, որ եվրոպացի ներդրողներին շատ հետաքրքրում են նաև Իրանի շուկայի հեռանկարը: Այնպես որ, Հայաստանի կարգավիճակը էապես մեծացնելու հնարավորությունների համար նոյեմբերի 24-ին ստեղծվել են իրական բոլոր պայմանները: Մնում է՝ կարողանալ այս ամենից օգտվել՝ ի շահ պետության զարգացման ու ՀՀ քաղաքացիների բարօրության: Թամար Բագրատունի
Հետևեք մեզ Viber-ում
