Փաշինյանը պատմելու է՝ 2023-ին ինչ պայմանավորվեց Ալիևի հետ․ Իշխան Սաղաթելյան (video)
Սեպտեմբերի 19-ին Արցախի հայաթափման պատասխանատուն անձամբ Նիկոլ Փաշինյանն է․ ադրբեջանական ներխուժման ու Արցախի կորստի 2-րդ տարելիցի օրը Եռաբլուրում լրագրողների հետ զրույցում ասաց ՀՅԴ Գերագույն մարմնի ներկայացուցիչ Իշխան Սաղաթելյանը։
«Նիկոլ Փաշինյանը մինչև հիմա լեգիտիմացնում է Ալիևի քայլերն ու գործողությունները, փորձում է լվանալ նրա արյունոտ ձեռքերն իր վարած քաղաքականությամբ։ Հիշեք՝ այդ ամենը տեղի ունեցավ այն ժամանակ, երբ ինքն Արցախը ճանաչեց Ադրբեջանի կազմում»,-ասաց Սաղաթելյանը։
Նա նշեց, որ Փաշինյանը մի օր պետք է պատմի, թե պատերազմից առաջ՝ հարձակման նախօրեին, ինչ է պայմանավորվել Ալիևի և Էրդողանի հետ։ «Պետք է պատմի, թե Ալիևի, Էրդողանի հետ ինչ է խոսել պատերազմից առաջ՝ 2023 թ.-ին։ Արդյո՞ք ինքն ամբողջությամբ տեղյակ էր այդ մասին և արդյո՞ք նաև երաշխիք էր տվել, որ ՀՀ-ն որևէ կերպ չի հարձակվելու, որևէ ծպտուն չի հանելու և լուռ նստելու է ու տեսնի, թե ինչպես են ցեղասպանություն գործում Արցախում»,-ասաց նա։
Ընդդիմադիր պատգամավորը պնդեց, որ Փաշինյանն իր այսօրվա քայլերով փորձում է ամբողջությամբ մոռացության տալ և կոծկել ամեն ինչ, ինչպես նաև ցանկացած քայլ անել՝ Ադրբեջանին ու թուրքերին դուր գալու համար։ Նա պնդեց, որ Փաշինյանը խաղաղության հետ որևէ կապ չունի, և այն ծրագիրը, որ առաջարկում էր, խաղաղ հանձնվելու ծրագիր է։
Հետևեք մեզ Viber-ում
