Ինչո՞ւ է Սերժ Սարգսյանն այդքան խտրականորեն հետապնդում հենց Գեւորգ Սաֆարյանին
Ինչո՞ւ է Սերժ Սարգսյանն այդքան խտրականորեն հետապնդում հենց Գեւորգ Սաֆարյանին: Նման հարցադրմամբ հայտարարություն է տարածել «Հիմնադիր խորհրդարանի» անդամ Ժիրայր Սեֆիլյանի կոչով ստեղծված «Հանուն Հայաստան պետության ճակատը»: Հայտարարությունում ասվում է. «32-ամյա քաղբանտարկյալ Գեւորգ Սաֆարյանը 2015-ի ամանորին իշխող ռեժիմի՝ Ազատության հրապարակ տոնածառ չտանելու ապօրինի պահանջին հակառակվելու հանդգնություն ունենալու համար, երկրում իշխանությունը յուրացրած Սերժ Սարգսյանի քմահաճույքով 2 տարի անցկացրեց բանտում: Ոստիկանների կեղծ ցուցմունքների վրա հիմնված շինծու «քրեական» գործն իր ավանդական խայտառակ ընթացքն ունեցավ իշխող ռեժիմի խամաճիկ դարձած դատական համակարգում: Նույն ոգով էլ կազմակերպվեց նրա պատիժ կրելը՝ ուղեկցվելով կալանավայրում նրա նկատմամբ կազմակերպված բռնություններով: Թվում էր, թե իշխող ռեժիմն այդքան ապօրինություններ գործելուց հետո կհրաժարվի մեկ այլ շինծու՝ «Ժիրայր Սեֆիլյան եւ ընկերների» գործով Գեւորգ Սաֆարյանի քաղաքական հետապնդումից, սակայն ոչ միայն չհրաժարվեց, այլեւ նոր խափանման միջոց կիրառելով՝ ցանկանում է առաջին պատժի ժամկետն ավարտվելուց հետո էլ անազատության մեջ պահել նրան: Հարց կարող է ծագել. ինչո՞ւ է Սերժ Սարգսյանն այդքան խտրականորեն հետապնդում հենց Գեւորգ Սաֆարյանին: Մեզ համար պատասխանը շատ հստակ է. Գեւորգ Սաֆարյանն այն բոլոր հատկանիշների կրողն է, որոնք խորթ ու անհանդուրժելի են Սերժ Սարգսյանի համար: Գեւորգը երիտասարդ է, համակրելի, ամբողջ սրտով սիրում է իր հայրենիքը եւ մեր երկրի պատվախնդիր ու նվիրյալ քաղաքացի է, ունի իր երկրի անկախության ու ժողովրդավարացման համար պայքարելու անկոտրում կամք ու կորով: Քաղբանտարկյալ Գեւորգ Սաֆարյանը պետք է անհապաղ ազատ արձակվի: Քանի դեռ նման մարդիկ բանտում են, մենք բոլորս ենք անազատության մեջ: Մեր համաքաղաքացիներին ու հայրենակիցներին կոչ ենք անում իրենց բոլոր հասանելի միջոցներով բողոք հնչեցնել Գեւորգ Սաֆարյանի դեմ ռեժիմի սանձազերծած քաղաքական ստոր հալածանքների դեմ»:
Հետևեք մեզ Viber-ում
