Անեծք, վայնասո՜ւն, բռնեք գողին

Գեներալ պատգամավոր Հանրապետական Սեյրան Սարոյանի անկեղծ զեղումը խորհրդարանում լուրջ քննարկումների տեղիք էր տվել՝ ում էր ուղղված Սարոյանի ամոթանքը, ում էր ասում՝ գետինը մտնեն։ Երկարատեւ բացակայությունից հետո Ազգային ժողովի նիստին ներկայացած Սեյրան Սարոյանը լրագրողների հետ զրույցում խոսելով վերջին թանկացումներից այսօր հայտարարեց, «Դե որ ամոթ ունենան, չեն թանկացնի էլի: Էդքան հարստանալ պետք չի էլի, օլիգարխ չէ, ով ուզում ա ըլի»։ Իհարկե, բախտներս բերեց, որ գեներալը սահմանափակվեց ամոթանքով, ասենք չթքեց օլիգարխների ճակատին, կարող էր չէ՞ որպես սրտացավ իշխանավոր գոնե անիծել գործընկերներին, թաղել տեղում նրանց բոյը, էլ չպատկերացնենք ավելի դաժան տեսարաններ, որը թույլ է տալիս նրա անցած ուղին, բայց գեներալը միայն ամոթանք տվեց։ Որպես պառլամենտական երկրի արժանի պատգամավոր, բա , հո, չէր ընկնելու «սուտի» բաների հետեւից, օրինակ կոչ հնչեցներ կառավարությանը, հորդորեր զսպել գնաճը, կամ սոցիալապես անապահով շերտի համար կոմպենսացներ այդ թանկացումները։ Մի խոսքով՝ իսկական գեներալի պահվածք ու նույն խրոխտությամբ էլ նա գնահատեց Սերժ Սարգսյանի՝ գող համայնքապետերի մասին ելույթը: «Ճիշտ ա ասել մեր նախագահը: Նախագահը եթե մի բան ասում ա, ուրեմն գիտի»,- ասաց նա: Հարցին, թե շա՞տ են թալանել համայնքների ղեկավարները, Սարոյանը պատասխանեց. «Ի՞նչ իմանամ, ես ռեվիզր չեմ, Զաքարյան Իշխանին գնացեք հարցրեք»: Ստացվում է, թե Սերժ Սարգսյանը չի պատժել գող համայնքապետերին եւ նրանց դատաստանը տեսնելու է միայն նոր տարում, Սեյրան Սարոյանը պատասխանեց. «Տես, ասեց էլի, որ ինչ-որ մի տեղ նոր ենք, պետություն ենք, նոր ենք վերականգնվում: Բայց հիմա ասեց՝ արդեն նորմալ ա: Իրանք գող չէին, ասենք կարող ա թերություն ա, կարող ա ճիշտ չի ծախսել փողը: Էսօր մեր գյուղապետերը շատերը դաժե գրագիտություն չունեն: Իրանց ազգությունը շատ էր, գյուղում դառնում էին գյուղապետ: Ու էդ փողերը ոչ թե ծախսում էին նորմալ տեղերում, այլ ոնց ուզեին: Հիմա, խնդիրը ոչ թե գողանալն էր, երևի ճիշտ չեք հասկացել նախագահի ասածը, որ էդ փողերը չփոշիացնեն, փչացնեն» իշխանության տգիտության մասին բարձրաձայնեց Սարոյանը։ Հիշեցմանը, որ Սերժ Սարգսյանն ասել է, որ համայնքապետերը համայնքի փողերը տուն են տանում, նա արձագանքեց. «Դե որ փչացնում ա, մի բան էլ տուն ա տանում էլի»։ Իհարկե, կարելի էր չկասկածել, որ խորամանկ գեներալը, որը հազար նվագի տակ կարող է հազար պար ածել թողներ, որ նախագահի խոսքը գետին ընկնի, կամ չթելեր Սերժ Սարգսյանի ասեղը, այս առումով առավել քան կանխատեսելի էր, որ նա երկու ձեռքով ծափահարելու էր իր նախագահին ու եթե երրորդ, չորրորդ ձեռքն ունենար, դրանք էլ չէր խնայելու, խնդիրն այստեղ այլ դաշտում է, որքան էլ Սեյրան Սարոյանը անկեղծ է եղել ու տարբերվող հայտարարություններ արել ՀՀԿ-ական գործընկերներից, այդուհանդերձ նա մշտապես մնացել է «գծի» մեջ ու երբեք չի հարվածել իշխանություններին։ Սակայն հիմա բացահայտ ամոթանք է տալիս «վայ օլիգարխներին»։ Սարոյանի այս հայտարարությունից հետո քաղաքական շրջանակներում քննարկում էին, որ այդ հայտարարությունը հենց այնպես, օդի մեջ չհնչեցվեց եւ այն ուղիղ հասցեատեր ուներ, որի անունն է Սամվել Ալեքսանյան։ Նշենք, որ անցած շաբաթ ՀՅԴ-ն ներկայացրեց տնտեսական կառույցի հետազոտությունները, համաձայն որոնց Ալեքսանյանին պատկանող Ալեքս գրիգ ընկերությունը կարագի ներմուծման մենաշնորհ ունի, իսկ կարագը վերջին շաբաթներին շեշտակի թանկացել է։ Ընդհանրապես բոլորն են խոսում, որ Ալեքսանյանին պատկանող խանութների ցանցում են համատարած թանկացումներ։ Սակայն Սարոյանը ըստ էության նման պոռթկում ունեցավ, քանի որ իր շահն էր դա պահանջում։ Արդեն երկար ժամանակ է մամուլը գրում է Սարոյանի ու Ալեքսանյանի տարաձայնությունների մասին։ Ալեքսանյանը իր օղու բիզնեսով կաթվածահար է արել Սարոյանի գործարանը եւ այդ հողի վրա վերջնականապես փչացել է նրանց հարաբերությունները։ Իսկ գործարար պատգամավոր Սամվել Ալեքսանյանն իր լպրիշ ոճում խորհրդարանի միջանցքներում պնդում էր, թե ինքը Հայաստանի թիվ մեկ չքավորն է՝ չունի բիզնես, ոչինչ չունի։ Նա բարի է ու ուզում է, որ Հայաստանում ոչ մի աղքատ մարդ չլինի ․ «Հայաստանում շատերը չեն կարողանում բիզնես դնել, որովհետեւ իմ դասերին չեն մասնակցում։ Տունը երեխեքին դասեր եմ տալիս, թե ոնց անեն բիզնես»,- պարծենում էր նա։ Իրականում նա պարծենալու բոլոր հիմքերն ունի, իշխանությունը նրա համար համակարգային այնպիսի մոնոպոլ դաշտ է ապահովել, որ եթե մաքսային մարմինները նույնիսկ թույլ տան , որ այդ մենաշնորհը որոշակիորեն կոտրվի, միեւնույն է, Ալեքսանյանը այնպես է տնօրինում շուկայի առյուծի բաժնին, որ մի ժամում կարող է շարքից հանել ցանկացած մրցակցի։ Անի Սահակյան