Ավելորդ խուճա՞պ. ինչ է բացահայտվել բրնձի փորձաքննություններից

Անհայտ ծագման բրնձի մասին հայտարարությունից հետո գիտական փորձաքննություններ են իրականացվել և պարզվել է, որ դա խնդրահարույց բրինձ է, բայց պլաստիկ բրինձ չէ:  Այս մասին այսօր լրագրողների հետ հանդիպմանն ասաց ՀՀ ԳԱԱ Էկոկենտրոնի սննդի շղթայի ռիսկերի գնահատման կենտրոնի ղեկավար, պարենային իրավունքի փորձագետ Դավիթ Պիպոյանը: Ինչպես տեղեկացրեց՝ ուսումնասիրությունները ցույց են տալիս, որ բրնձի վրա ինչ-որ թաղանթ կա, բայց միևնույն է` դա բրինձ է, ոչ թե պլաստիկ: «Բոլորին թվում է, թե իրենց բնակարաններում պլաստիկ բրինձ է: Պետք է ասեմ, որ այդ կեղծ բրինձը ոչ թե պլաստմասսայից է պատրաստված, այլ կարտոֆիլի օսլայից, որին ավելացված են ինչ-որ նյութեր, որոնք դեռևս հայտնի չեն»,- հայտնեց Դավիթ Պիպոյանը: Նրա խոսքով՝ այս օրերին գլխավոր խնդիրն այն է, որ մարդիկ արհեստական բրնձի հետ կապված ավելորդ խուճապի են մատնվում: Հայաստանում հայտնված անհայտ ծագման բրինձը չի եփվում, այնուհետև գարշահոտ է գալիս: Ընդ որում՝ կատարված փորձաքննությունը ցույց է տալիս, որ նորմալ բրինձը որոշ ժամանակ փակ տարայի մեջ մնալուց հետո բորբոսնում է, իսկ անհայտ ծագման բրնձի դեպքում բորբոս չի առաջանում: