Արցախը ՀՀ իշխանությունների «վզին թոկ է» դարձել․ Սամվել Շահրամանյան (video)

Ցավոք, մենք հայտնվել ենք դաժան իրականության մեջ, իրականությունն այն է, որ Արցախը համարվում է թոկ ՀՀ-ի վզին, որից պետք էր ազատվել, որպեսզի ստանան հնարավորություն պահպանել ՀՀ-ի անկախությունը, ինքնիշխանությունը. Եռաբլուրում «Արցախի կանչը» հուշահամալիրի բացմանը իր ելույթի խոսքում ասաց Արցախի նախագահ Սամվել Շահրամանյանը։

«Այստեղ հանգչող մարդիկ զոհվել են հանուն Արցախի, պայքարել են հանուն Արցախի, բայց ցավոք այսօր նրանց հարազատները և հազարավոր արցախցիներ համարվում են փախստական իրենց հայրենիքում։ Նման հուշակոթողը նվիրված կլինի Արցախի գոյապայքարի բոլոր նվիրյալներին, ՊԲ-ի պահեստի պայթյունի հետևանքով զոհված հայրենակիցներին, նվիրված կլինի Արցախում մնացած մեր շիրիմներին»,-ասաց ԱՀ նախագահը։

Շահրամանյանը անհատական շնորհակալություն հայտնեց Արթուր Վանեցյանին՝ սրտացավ վերաբերմունքի համար. «Այս նախագծի առաջին իսկ օրվանից այդ պատրաստակամությունը հայտնելու և իր ու իր ընտանիքի անձնական միջոցների հաշվին նման հուշակոթող կառուցելու համար։ Նաև անհատական շնորհակալություն հայտնել Կարեն Սարգսյանին, որը առաջին օրվանից մինչ այսօր սրտացավ վերաբերմունք է ցուցաբերել, ներդրել է անձնական միջոցները, որպեսզի մեր հայրենակիցները տեղ ունենան ծաղիկ խոնարհելու և խունկ վառելու։ Համոզված եմ, որ այս հուշակոթողը դառնալու է նոր սրբավայր՝ ոչ միայն արցախցիների համար։ Մենք շարունակելու ենք այս հուշակոթողում ավանդույթ դարձած մեր սովորությունները՝ տոն ու հիշատակի օրերին այցելել հուշակոթող։ Անպայման մտքում պետք է պահենք վերադարձի հույսն ու հավատը։ Համոզված եմ, որ մի օր դա իրականություն կդառնա»,-ասաց նա։