Բղավոցներ «Սասնա ծռերի» գործով նիստում

«Սասնա ծռեր-2»-ի գործով այսօր դատավորը ճշտեց 11 անդամների դիրքորոշումը՝ մեղադրանքի վերաբերյալ։ Անդամներից Արամ Մանուկյանը նշեց, որ մեղադրական եզրակացության հետ կապ չունի, իրենք ապստամբություն են կատարել, և ապստամբության հոդվածով պետք է մեղադրանք ներկայացվի։ Հովհաննես Հարությունյանն էլ ապստամբությունը համարեց սրբազան պարտք։ Սասնա ծռերի մյուս բոլոր անդամները եւս չընդունեցին մեղադրանքը։  Այնուհետև միջադեպ տեղի ունեցավ ամբաստանյալների պաշտպանների եւ դատավորի միջեւ: Ամբաստանյալների պաշտպաններից Լուսինե Սահակյանը հայտնեց, որ առարկում է դատավոր Արթուր Օհանյանի գործողությունների դեմ: Վերջինս էլ ընդգծեց, որ դատախազը խոսում էր եւ չի կարելի ընդհատել, սակայն Լուսինե Սահակյանը շարունակեց և բղավելով ասաց. «Մի՜ գոռացեք իմ վրա, ձեր ձայնն իջեցրե՜ք…դուք ցանկանում եք ձգձգել նիստը: Եթե չարգելեիք արտահայտվել, հիմա արդեն ասել էի: Ես իրավունք ունեմ առարկելու ձեր գործողությունների դեմ, դուք չեք կարող արգելել»: Դատավոր Արթուր Օհանյանը պատասխանեց. «Մի՜ օգտվեք այն փաստից, որ կին եք, ու ձեզ բան չենք ասում»: Փաստաբան Երվանդ Վարոսյանն էլ իր տեղից բղավեց. «Առարկություն ներկայացնելու իրավունք ունեն բոլորը՝ անկախ սեռից»: Ամբաստանյալներից Մարտիրոս Հակոբյանն էլ՝ «Դեդը»-ը առանց դատավորի թույլտվության՝ վեր կացավ ու ցանկացավ հեռանալ, ինչը կանխեցին ոստիկանները: