Համայնքապետերը թալանել են, ինչպես կարողացել են՝ առանց հանգստանալու, շունչ քաշելու. Մարուքյան

Համայնքապետերի չարաշահումների մասին Սերժ Սարգսյանի ելույթը սպասված էր, ԱԺ ճեպազրույցների ժամանակ ասաց «Ելք» խմբակցության պատգամավոր Էդմոն Մարուքյանը՝ անդրադառնալով ՏԻՄ համաժողովի ժամանակ նախագահի այն հայտարարությանը, որ ՏԻՄ կայացման ժամանակ եղել են չարաշահումներ համայնքապետերի կողմից, ինչը նրանց ներվել է, բայց 2018-ից այլևս ներում չի լինելու։ «Երկար տարիներ բոլորս գիտենք, որ ունենք համայնքի գող, թալանչի ղեկավարներ։ Նրանք եղել են ու կան, նրանք մեր աչքի առաջ հարստացել են, մեր քաղաքների գյուղերի հողերը, անշարժ գույքերն, քաղաքի կենտրոնում գտվող շենքերը սեփականաշնորհել են իրենց պաշտոնավարման ընթացքում, թալանել են ինչպես կարողացել են՝ առանց շունչ քաշելու, ու հարց է առաջանում՝ օրինակա՞ն է մարդն ամեն ինչ անում, թե՞ ոչ։ Նախագահի ելույթով պարզվեց, որ այս մարդիկ անօրինական են գործել ու այդ մասին իմացել են», - նշեց նա։ Նա հիշեցրեց, որ նախագահն ասում էր՝ ներել ենք այն համայնքապետերին, ովքեր որոշ լիազորություններ չարաշահել են, որովհետև ՏԻՄ-ը պետք է կայանար: «Ես համաձայն եմ, որ կարող են թերություններ լինել, բայց նման ձևով թալանը չէ, որ պետք է կայացնի ՏԻՄ-ը, կայացել է թալանչիների մեծ խմբավորում, որ ամեն ընտրության ժամանակ իր ծառայությունն է մատուցել»,-նշեց նա: Վերջինիս խոսքով՝ թալանչիներն այն մարդիկ են, ովքեր ՀՀԿ անդամ են, ում իշխանությունն ամենաբարձր մակարդակով ներել է: